ԵՐԵՎԱՆ, 27 ապրիլի – Sputnik. «Ապրելու երկիր» կուսակցությունը պահանջում է Երևանի ավագանու արտահերթ ընտրություններ։ Տեղեկությունն իր ֆեյսբուքյան էջում հայտնել է կուսակցության ղեկավար Մանե Թանդիլյանը։
Նշվում է, որ կուսակցությունը նման պահանջ ունի, քանի որ ստեղծված իրավիճակում օրենսդրությունն է այդպես նախատեսում։
Հարցն այն է, որ Երևանի քաղաքապետ Հրաչյա Սարգսյանի հրաժարականից 2 շաբաթ անց գործող ավագանին իր կազմից այդպես էլ չընտրեց նոր քաղաքապետ։
Թանդիլյանի խոսքով` այս իրավիճակում, ըստ օրենսդրական կարգավորումների, կառավարությունը պետք է կրճատի ավագանու լիազորությունների ժամկետն ու, միաժամանակ, նշանակի ավագանու արտահերթ ընտրություններ։
«Երևանցիների կողմից չընտրված, բայց Երևանի «ճակատագիրը» իր քվեին ծառայեցնող քաղաքապետի պաշտոնին հավակնողի խոսքից արդեն ակնհայտ է, որ ակնհայտ փորձ է կատարվում շրջանցելու օրենսդրությունը՝ չկատարելով օրենքի պահանջը։ Արտահերթ ընտրությունները անձամբ իրեն ու իր ուժին ձեռնտու չեն՝ գահավիժող անվստահության և հիասթափության ֆոնին։ Իրենք վախենում են արտահերթ ընտրություններ անցկացնելուց, քանի որ գիտեն` օրինական ժամկետում ընտրություններ անցկացնելու պարագայում երևանցին իրենց մերժելու է»,–ասված է Թանդիլյանի գրառման մեջ։
Նրա խոսքով` «Ապրելու երկիրը» սպասում է կառավարության խելամտությանն ու պահանջում, որ օրենքը վեր դասեն քաղաքական նպատակահարմարություններից, այլապես հանդիպման վայրը դատարանն է լինելու։
Հիշեցնենք, որ ապրիլի 22-ին «Ապրելու երկիր» կուսակցության համագումարի ժամանակ Թանդիլյանը հայտնել էր` որոշել են մասնակցել և հաղթել Երևանի ավագանու ընտրություններում։
Հավելենք, որ Երևանի ավագանու ընտրությունները նախատեսված են 2023 թվականին։ «Քաղաքացիական պայմանագիր» կուսակցությունը մարտի 31-ին հայտարարեց, որ Երևանի ավագանու ընտրություններում առաջադրելու է Տիգրան Ավինյանի թեկնածությունը։ Սեպտեմբերի 23-ին նա Երևանի փոխքաղաքապետ ընտրվեց։
Ընտրություններին կմասնակցեն նաև գործարար Տիգրան Արզաքանցյանի կինը՝ ազգությամբ ռուս Նատալյա Ռոտենբերգը, որը վերջերս է Հայաստանի քաղաքացիություն ստացել, երգիչ Ռուբեն Հախվերդյանը, «Լույս» խմբակցության ղեկավար Դավիթ Խաժակյանը, Կենտրոն վարչական շրջանի նախկին ղեկավար Վիկտոր Մնացականյանը։
Քաղաքապետի պաշտոնի համար կպայքարի նաև «Ազգային առաջընթաց» կուսակցությունը, որի ցուցակը կգլխավորի վարչության անդամ Հայկ Գրիգորյանը։
ԱԺ նախկին պատգամավոր, ԱԱԾ նախկին ղեկավար, «Հայրենիք» կուսակցության նախագահ Արթուր Վանեցյանը չի բացառել, որ կառաջադրի իր թեկնածությունը Երևանի քաղաքապետի ընտրություններում։