ԵՐԵՎԱՆ, 23 ապրիլի – Sputnik. Շաքարի համաշխարհային գները հասել են վերջին 11 տարվա առավելագույնին նիշին: Nasdaq-ի փոխանցմամբ՝ շաքարավազի գինը հասել է 1 ֆունտի դիմաց 24 ցենտի (տոննայի դիմաց մոտ 530 դոլար- խմբ.): Մեկ տարի առաջ գները 19-20 ցենտի մակարդակում էին, այսինքն՝ մեկ տոննայի դիմաց 420-440 դոլար։ Հայաստանում 2023 թվականի մարտին, 2022 թվականի մարտի համեմատ, շաքարավազը թանկացել է գրեթե 11 տոկոսով։
Ինչպես նշել է Dnext տվյալների բազայի վերլուծաբան Ջոն Սթենսֆիլդը, կրճատվել են բերքի գնահատականները ասիական խոշորագույն շաքար արտադրող երկրներում։ Մասնավորապես, Հնդկական շաքարի ասոցիացիան 22-23 սեզոնի համար (hոկտեմբեր-սեպտեմբեր) բերքի կանխատեսումները կրճատել է մոտ 3%-ով։ Բերքը կրճատվել է Մահարաշտրա նահանգում անժամանակ անձրևների պատճառով․ այս նահանգին է բաժին ընկնում Հնդկաստանի շաքարեղեգի տնկարկների ավելի քան մեկ երրորդը (իսկ Հնդկաստանը Բրազիլիայից հետո աշխարհում երկրորդ շաքար արտադրողն է):
Եթե խոսենք եվրոպական տարածաշրջանի մասին, ապա այստեղ անցյալ տարվա չորային պայմանների պատճառով կրճատվել են շաքարի ճակնդեղի տնկարկները (ինչն էլ այս տարի կհանգեցնի ավելի ցածր բերքատվության)։
Շաքարավազի գինը կարող է մի փոքր նվազել երկու գործոնների շնորհիվ. նախ՝ Չինաստանը կարող է պետական ռեզերվներից շաքար նետել շուկա, երկրորդ՝ Բրազիլիայում շուտով կսկսվի բերքահավաքը։
Սակայն ռիսկի գործոններ ևս կան․ ԱՄՆ Օվկիանոսային և մթնոլորտային պայմանների ազգային վարչակազմի գնահատմամբ՝ մայիս-հունիս ամիսներին մեծ է «Էլ Նինյո» ջերմային ալիքի հավանականությունը, որի պատճառով կարող են կրճատվել անձրևների տեղումները ասիական տարածաշրջանում (և, հետևաբար, շաքարեղեգի բերքը):
Մյուս գործոնը, որը կարող է ազդել գների վրա, OPEC-ի վերջերս ընդունված որոշումն է՝ նավթի արդյունահանումը կրճատել օրական մոտ 1,16 միլիոն բարելով (համաշխարհային արդյունահանման 1%-ից մի փոքր ավելին): Դրա պատճառով ավելի շատ շաքարեղեգ կուղղվի բիովառելիքի արտադրությանը (հիմնականում այս պրակտիկան կիրառվում է Բրազիլիայում):