ԵՐԵՎԱՆ, 23 ապրիլի – Sputnik. Ծանրամարտի Եվրոպայի առաջնության արծաթե և բրոնզե մեդալակիրներ Վարազդատ Լալայանն ու Սիմոն Մարտիրոսյանը երկրպագուներին խոստանում են նոր ու ավելի լավ արդյունքներ հաջորդ առաջնություններում։
«Գնում ենք դեպի հաղթանակ, բայց քայլ առ քայլ, փուլ առ փուլ»,– լրագրողների հետ զրույցում նշեց Լալայանը։
Նա չցանկացավ պատասխանել հարցին, թե ե՞րբ է վերջապես Լալայանը «գահընկեց անելու» օլիմպիական կրկնակի, աշխարհի 6-ակի և Եվրոպայի արդեն 7-ակի չեմպիոն վրացի Լաշա Տալախաձեին։
«Համալիրի էներգետիկան շատ ուժեղ էր, շատ օգնեց»,– հավելեց Եվրոպայի կրկնակի փոխչեմպիոնը։
Սիմոն Մարտիրոսյանն էլ նշեց, որ իր հաղթանակը մայրիկին է նվիրում, ում ծննդյան օրն է այսօր։ Իր ելույթն առաջնությունում այս պահի դրությամբ լավ գնահատեց։
«Ընդամենը ամիս ու կես եմ հասցրել մարզվել, քանի որ վնասվածքները թույլ չտվեցին, որ լիարժեք բոլոր հավաքներին մասնակցեմ, 100 տոկոսանոց մարզավիճակ ձեռքբերեմ, ուստի այս պահի դրությամբ գոհ եմ»,– նշեց Մարտիրոսյանը։
Խոստացավ, որ աշխարհի առաջնությունում հայ մարզասերները նոր արդյունքներ կտեսնեն։
Խոսեց նաև մարզահամերգային համալիրում տիրող տրամադրության մասին, իր զգացողությունների, երբ ամբողջ դահլիճը «Սիմոն» էր վանկարկում։
«Առաջին անգամ հասկացա, թե ուժը որտեղից է գալիս` հայրենի հողից, հայրենի ջրից ու հայ մարդկանցից»,-ասաց նա։
Երևանում ավարտվեց ծանրամարտի Եվրոպայի առաջնությունը, որը մեկնարկել էր ապրիլի 15-ին։ Հայաստանը երկամարտի արդյունքում գրավեց առաջին տեղը 4 ոսկե, 4 արծաթե, 5 բրոնզե մեդալներով։