ԵՐԵՎԱՆ, 22 ապրիլի – Sputnik. Ֆրանսիայի հարավում գտնվող Պերոլ կոմունայում գործող «Peña Pil Pil» ռեստորանի վարկանիշը կտրուկ ընկել է, երբ այդ հաստատություն է այցելել Ֆրանսիայի նախագահ Էմանուել Մակրոնը։ Տեղեկությունը հայտնում է ՌԻԱ Նովոստին՝ հղում անելով «France Bleu»-ին:
Մակրոնը Ֆրանսիայի հարավում գտնվող Էրո դեպարտամենտ էր այցելել ապրիլի 2-ին: Այցի ընթացքում նա գարեջուր խմելու համար կանգ էր առել վերոնշյալ ռեստորանում։
Մակրոնի այցից ընդամենը մի քանի ժամ անց Google-ում հաստատության վարկանիշը 5/5-ից իջել է 1,6/5–ի: Ռեստորանի մատուցող Վենսանը լրատվամիջոցին պատմել է, որ նախագահի այցն իրենց համար անակնկալ է եղել։
«Մենք չգիտեինք, որ նա կգա մեզ մոտ։ Բայց մենք չենք կարող մեզ թույլ տալ չընդունել հանրապետության նախագահին կամ նախարարին», - հավելել է մատուցողը։
Էրո դեպարտամենտ կատարած այցի ընթացքում Ֆրանսիայի նախագահին ամենուր ուղեկցել են ցուցարարները, որոնք վանկարկել են. «Մակրոն, հեռացի՛ր»։
Գանժ կոմունայում նրան մի քանի հարյուր ցուցարարներ են սպասել, որոնք փորձել են ճեղքել Լուիզ Միշել քոլեջի մուտքի մոտ դրված պատնեշները, որպեսզի մոտենան Ֆրանսիայի առաջնորդին։ Ոստիկանությունը ստիպված է եղել արցունքաբեր գազ կիրառել։ Ցուցարարներն էլ սկսել են նրա վրա ձու և կարտոֆիլ նետել։