ԵՐԵՎԱՆ, 22 ապրիլի – Sputnik. «Հրապարակ» թերթը փորձել է պարզել` արդյոք այս տարի կնշվի Քաղաքացու օրը, որը 2020-ին չնշվեց կորոնավիրուսի պատճառով, 2021-ին՝ պատերազմի պատճառով։
«Մենք մի քանի օր է՝ փորձում ենք կառավարությունից ստանալ այս հարցի պատասխանը, չի հաջողվում։ Սակայն ՔՊ-ական պատգամավորներից ոմանց հետ հարցուփորձից պարզ դարձավ, որ նրանք արդեն մոռացել են, որ նման տոն կա, ուստի խոստովանեցին, որ գաղափար չունեն՝ այս տարի ինչ-որ ձևով այն կնշվի, թե ոչ»,– գրում է թերթը:
2019-ին «Տոների և հիշատակի օրերի մասին» օրենքում կատարվեց փոփոխություն, համաձայն որի՝ ապրիլի վերջին շաբաթ օրը նշվում է որպես Քաղաքացու օր:
Պարբերականը շեշտում է` այսօր փաստ է, որ գործող իշխանությունները մինչ օրս ընդամենը մեկ անգամ են նշել այդ արհեստածին տոնը՝ 2019-ին, երբ Երևանի փողոցներում տոնական միջոցառումներ էին կազմակերպվել, անգամ Մաշտոցի պողոտայում խորոված էին անում, որին մասնակցում էին երկրի բարձրաստիճան պաշտոնյաները՝ վարչապետ Նիկոլ Փաշինյանի գլխավորությամբ: