ԵՐԵՎԱՆ, 21 ապրիլի – Sputnik. ՊՆ-ն կարո՞ղ է ծախսել ամբողջ գումարը, եթե կառավարությունը կրկնապատկի բյուջեն, ԱԺ արտահերթ այսօրվա նիստի ժամանակ հարց հնչեցրեց վարչապետ Նիկոլ Փաշինյանը։
«Ընդդիմադիր մեր գործընկերները մի քանի տեղ ոչ ուղղակի, բայց ասել են, թե անվտանգային այս միջավայրում ինչ ենք եկել ու ասֆալտ ենք սարքում, լույս քաշում և այլն։ Գուցե ամբողջ միլիարդները ներդնենք անվտանգության վրա։ Ասֆալտի հերն էլ անիծած»,–ասաց Փաշինյանը։
Սրա մեջ, ըստ նրա, տրամաբանություն կա, սակայն ամբողջական չէ, քանի որ ասֆալտը նույնպես անվտանգային խնդիր ունի, քանի որ ասֆալտը զորքի շարժունակությունն է։
«Բացի այդ, ո՞վ է ասել, որ մենք այսօր 5 կամ 2 միլիարդ տանք բանակին (մեկ միլիարդ դոլար արդեն իսկ տվել են - խմբ.) կամ այլ պետական կառույցի, այդ կառույցն ի վիճակի կլինի ծախսել։ Այստեղ մենք ֆունդամենտալ խորը խնդիրներ ունենք ինստիտուցիոնալից սկսած մինչև պրակտիկ»,–ասաց վարչապետը։
Նրա խոսքով` այսօր չեն կարողանում այդ գումարը ծախսել օբյեկտիվ և սուբյեկտիվ պատճառներով։
Հիշեցնենք, որ 2023-ի պաշտպանական բյուջեն 506 մլրդ դրամ է կազմում (1 մլրդ 280 մլն դոլար)։