ԵՐԵՎԱՆ, 21 ապրիլի – Sputnik. Ռազմաարդյունաբերությանը 6.8 միլիարդ դրամ է հատկացվել, և եթե այդ գումարի գոնե կեսը իրացվում է, արդեն իսկ լավ է։ Նման հայտարարություն է արել ՀՀ նախագահ Վահագն Խաչատուրյանը` Գիտությունների ազգային ակադեմիայի տարեկան հաշվետու ժողովումունեցած ելույթում, հայտնում է ՀՀ նախագահի մամուլի ծառայությունը։
«Մենք 6.8 միլիարդ ունենք հատկացված ռազմաարդյունաբերությանը, և եթե այդ գումարի գոնե կեսը իրացվում է, մենք ուրախանում ենք։ Ես հիմա էլ ցանկանում եմ խնդրել բոլորիդ աշխատել այդ ուղղությամբ։ Եթե կան գաղափարներ, որոնք օգտակար կլինեն Հայաստանի անվտանգության բարձրացմանը, հենց ռազմաարդյունաբերության համալիրին, ապա ֆինանսական ռեսուրսը կա, պետությունն այդ հնարավորությունը տալիս է և մեծ ակնկալիքներ ունի հենց գիտությունից»,–ասել է Խաչատուրյանը։
Անդրադառնալով ԳԱԱ–ն տրոհելու մասին լուրերին` Խաչատուրյանը նշել է, որ իրեն ավելի քիչ է անհանգստացնում ակադեմիայի միավորման-բաժանման հարցը, որովհետև լուծումներ կարելի է գտնել: Կարևորը, ըստ նրա, բովանդակությունն է. ավելի կարևոր է հասկանալ, թե ինչ են ուզում, ինչպիսի գիտություն են ուզում կամ ինչու մեր գիտական արդյունքները մեզ չեն բավարարում:
Նախագահը հավելել է, որ իշխանությունն ակադեմիային հակադրվելու ցանկություն չունի և չի էլ ունեցել` ակադեմիան իշխանության մաս է։
Հիշեցնենք, որ փետրվարի սկզբին ԿԳՄՍ նախարար Ժաննա Անդրեասյանն այցելել էր ԳԱԱ։ Նախարարն անդրադարձել էր նաև բուհերի և ակադեմիական ինստիտուտների` տարատեսակ շահարկումների և մտահոգությունների պատճառ դարձած հնարավոր միավորմանը՝ ընդգծելով, որ սա առանձին գործընթաց է։
Նախարարն ասել էր, որ ՀՀ կրթության՝ մինչև 2030 թվականը զարգացման պետական ծրագիրը սահմանել է հստակ թիրախներ: նախորդ տարվա աշնանը ձևավորվել է աշխատանքային խումբ, որի հիմնական խնդիրն էր պատրաստել վերլուծական տեղեկանք, որում պետք է ներառված լինեն թիրախին հասնելու տարբեր մոտեցումներ, ճանապարհներ և սցենարներ՝ իրենց դրական ու բացասական կողմերով:
Պետք է տրվեր նաև որոշակի տեղեկատվություն, որը պետք է հիմք հանդիսանար հետագա քննարկումների և որոշման կայացման համար: Համապատասխան վերլուծական տեղեկանքն այժմ մշակման փուլում է: