ԵՐԵՎԱՆ, 21 ապրիլի – Sputnik. Առողջապահության համաշխարհային կազմակերպությունը (ԱՀԿ) մտադիր է հանձնաժողով ստեղծել միայնության խնդիրն ուսումնասիրելու համար, այն պետք է զբաղվի միայնության վիճակի սահմանման և ցուցիչի մշակմամբ։ Ինչպես տեղեկացնում է ՌԻԱ Նովոստին, այս մասին հայտնել է ԱՀԿ-ի առողջության սոցիալական դետերմինանտների դեպարտամենտի տնօրեն Էթյեն Կրուգը:
Համաժողովի ընթացքում Կրուգն ասել է, որմենակությունն ու սոցիալական մեկուսացումը երկար ժամանակ անլուրջ խնդիրներ են համարվել, սակայն այժմ ակնհայտ է, որ դրանց բախվում են ինչպես տարեցները, այնպես էլ երիտասարդները, ինչպես աղքատ, այնպես էլ հարուստ երկրներում: ԱՀԿ ներկայացուցիչն ընդգծել է, որ միայնության խնդիր կա այնպիսի պետությունների օրակարգում, ինչպիսիք են Շվեդիան, Բրիտանիան, Ճապոնիան և ԱՄՆ-ն, սակայն երկրների մեծ մասը բավարար ուշադրություն չի դարձնում դրան:
«Հավանաբար մենք հանձնաժողով կստեղծենք, որը կաշխատի այդ վիճակի նշանակությունը բարձրացնելու, զեկույցներ մշակելու և անելիքների վրա։ Խնդիրներից մեկը տվյալների հավաքումն է, ուստի մենք կաշխատենք որոշ ցուցիչի սահմանման, չափման և ստեղծման վրա, մենք կփորձենք ավելի շատ տեղեկություն հավաքել այն մասին, թե ինչ կարելի է անել այդ խնդրի լուծման համար», - ասել է Կրուգը։
ԱՀԿ փորձագետի կարծիքով` իր նշած հանձնաժողովը կարող է ստեղծվել առաջիկա երկու-երեք ամիսների ընթացքում։