ԵՐԵՎԱՆ, 19 ապրիլի – Sputnik. «Հանրային ձայն» կուսակցության ղեկավարների կողմից առանձնապես խոշոր չափերով շորթում կատարելու վերաբերյալ քրեական վարույթով երեք անձ է կալանավորվել։ Այս մասին հայտնում են ՀՀ քննչական կոմիտեից։
Ավելի վաղ հայտնել էինք, որ «Հանրային ձայն» կուսակցության համանախագահների` Վարդան Ղուկասյանի և Արտակ Գալստյանի նկատմամբ հանրային քրեական հետապնդում է հարուցվել, 2 անձ ձերբակալվել է, իսկ Գալստյանը երկու ամսով կալանավորվել էր։
Նախաքննությամբ պարզվել են խմբի կազմում առանձնապես խոշոր չափերով շորթում կատարելու դեպքերի մի շարք էական հանգամանքներ։
Բացի Արտակ Գալստյանից ձերբակալվել էին ևս երկու անձ՝ Ա․ Մկրտումյանը և Է․ Հովսեփյանը։ Երեկ հայտնի դարձավ, որ Արտակ Գալստյանը կալանավորվել է։
Վերջիններիս նկատմամբ գիշերային ակումբի պատասխանատու աշխատակցից խմբի կազմում առանձնապես խոշոր չափերով շորթում կատարելու դրվագով ևս հարուցվել է հանրային քրեական հետապնդում և նշված երեք անձանց ներկայացվել է մեղադրանք։ Նրանք կալանավորվել և տեղափոխվել են քրեակատարողական հիմնարկ։
Քրեական վարույթը նախաձեռնվել է ՀՀ քրեական օրենսգրքի 44-296-րդ հոդվածի 3-րդ մասի 3-րդ կետով ((փողերի լվացման փորձ, որ կատարվել է առանձնապես խոշոր չափերով), 258-րդ հոդվածի 3-րդ մասի 3-րդ կետով (շորթումը, որը կատարվել է առանձնապես խոշոր չափերով)։
Հիշեցնենք, որ կուսակցության անդամները կասկածվում են գումար շորթելու և փողերի լվացման փորձ կատարելու մեջ։ Ձեռնարկված ապացուցողական գործողությունների արդյունքում փաստական տվյալներ են ձեռք բերվել, որ Գալստյանն ու Ղուկասյանը (հայտնի է Դոգ մականունով` խմբ.) միմյանց հետ նախնական համաձայնություն են ձեռք բերել Տ. Ա.-ից (ըստ Sputnik Արմենիայի տեղեկությունների` Տիգրան Արզաքանցյանից) առանձնապես խոշոր չափերով շորթում կատարելու վերաբերյալ։