ԵՐԵՎԱՆ, 19 ապրիլի – Sputnik. Ապրիլի 11-ին ադրբեջանական սադրանքի հետևանքով վիրավորում ստացած 6 զինծառայողների շրջանում արդեն կան դուրս գրվողներ։ Տեղեկությունը Sputnik Արմենիային հայտնեց ՀՀ ՊՆ մամուլի խոսնակ Արամ Թորոսյանը։
Նրա խոսքով` առողջական վիճակը բավարար գնահատվող զինծառայողների մի մասն արդեն ամբուլատոր բուժում է ստանում:
«Ապրիլի 11-ին ադրբեջանական սադրանքի հետևանքով վիրավորում ստացած 6 զինծառայողներից 5-ի վիճակն արդեն գնահատվում է բավարար: Նախորդիվ ծայրահեղ ծանր վիճակում գտնվող զինծառայողի վիճակն արդեն գնահատվում է ծանր, բուժման ընթացքը՝ դրական»,–ասաց Թորոսյանը։
Հիշեցնենք` Ադրբեջանի ԶՈւ ստորաբաժանումներն ապրիլի 11-ին` ժամը 16:00-ի սահմաններում, կրակ են բացել Տեղ համայնքի ուղղությամբ ինժեներական աշխատանքներ իրականացնող ՀՀ ԶՈւ զինծառայողների ուղղությամբ, հայկական կողմը դիմել է պատասխան գործողությունների:
Ժամը 17:30-ի սահմաններում Ադրբեջանի ԶՈւ ստորաբաժանումները կիրառել են ականանետային միջոցներ։ Ադրբեջանական սադրանքի հետևանքով հայկական կողմն ունի 4 զոհ և 6 վիրավոր։
ՀՀ առողջապահության նախարար Անահիտ Ավանեսյանն ապրիլի 12-ին հայտնել էր` Սյունիքի մարզի Տեղ գյուղում ադրբեջանական սադրանքի հետևանքով վիրավորված վեց զինծառայողներից չորսը Երևանում են, մյուս երկուսը՝ Սիսիանում։