ԵՐԵՎԱՆ, 19 ապրիլի – Sputnik. Սպորտային մարմնամարզության Հայաստանի հավաքականը կմասնակցի առանձին գործիքների աշխարհի գավաթի խաղարկության 4-րդ փուլի մրցաշարին։ Այս մասին հայտնում է Հայաստանի մարմնամարզության ֆեդերացիայի մամուլի ծառայությունը։
Մրցաշարը տեղի է ունենալու ապրիլի 25-30-ը Եգիպտոսի մայրաքաղաք Կահիրեում։
Կազմում լինելու են Հարություն Մերդինյանը, Արթուր Դավթյանը և Գագիկ Խաչիկյանը, մարզիչներ Հայկ Նազարյանը և Աշոտ Գասպարյանը, իսկ մրցավարը կլինի Հակոբ Սերոբյանը։
«Աշխարհի գավաթների խաղարկությունը վարկանիշային է աշնանը Բելգիայում անցկացվելիք աշխարհի առաջնության համար, որի ընթացքում կխաղարկվեն Փարիզի օլիմպիական խաղերի ուղեգրեր»,– ասվում է հաղորդագրությունում։
Նշենք, որ Աշխարհի գավաթի խաղարկության նախորդ 2 փուլում, որոնք անցկացվել են Գերմանիայում և Կատարում, Արթուր Դավթյանը հենացատկում ոսկի է նվաճել, Գագիկ Խաչիկյանը նժույգ թափերում` արծաթ, իսկ Արթուր Ավետիսյանն օղակներ վարժությունում բրոնզե մեդալակիր է դարձել։