ԵՐԵՎԱՆ, 18 ապրիլի - Sputnik. Դատախազության թերացումն է, որ Զանգեզուրի պղնձամոլիբդենային կոմբինատի պահնորդին ադրբեջանցի զինվորի սպանելու դեպքով չկան ապացույցներ։ Այս մասին լրագրողների հետ զրուցում ասաց «Քաղաքացիական պայմանագիր» խմբակցության պատգամավոր Նարեկ Ղահրամանյանը։
«Ես հիմա էլ եմ հաստատում` կոմբինատի պահնորդին ադրբեջանցի զինվորն է սպանել»,–շեշտեց ՔՊ–ական պատգամավորը։
Լրագրողների դիտարկմանը, որ իրավապահները հերքում են` ասելով, որ չկան ապացույցներ ադրբեջանցիներին մեղադրանք առաջադրելու, Ղահրամանյանը պատասխանեց
«Չկան ապացույցներ, կլինեն։ Իսկ եթե չկան՝ իրենց թերացումն է»։
Ավելի վաղ Նարեկ Ղահրամանյանը լրատվամիջոցների հետ զրույցում վստահեցրել էր, որ Զանգեզուրի պղնձամոլիբդենային կոմբինատի 57-ամյա պահնորդին սպանել է Հայաստանի Հանրապետության սահմանը հատած ադրբեջանցի զինծառայողը։
Հիշեցնենք` ապրիլի 10-ին հայտնի դարձավ, որ նախորդ օրը Սիսիանի Բնունիս համայնքում ադրբեջանցիներ են հայտնվել: Բնակիչներից մեկի դռան զանգն են խփել, դուռը բացած կինն անմիջապես դիմել է ոստիկանություն։
Ավելի ուշ ՊՆ–ն հաստատեց տեղեկությունը` նշելով, որ ՀՀ տարածքում հայտնաբերվել և ձերբակալվել է Ադրբեջանի ԶՈւ մեկ զինծառայող, իսկ մյուսին որոնում են։
Ապրիլի 13-ին ՊՆ–ն հայտնեց, որ ՀՀ տարածքում հայտնաբերվել և ձերբակալվել է ադրբեջանցի երկրորդ զինծառայողը: Նա կասկածվում է ԶՊՄԿ–ի աշխատակցի սպանության մեջ։