ԵՐԵՎԱՆ, 18 ապրիլի – Sputnik. Երևանում` Հայաստանի Ամերիկյան համալսարանի բակում տեղի է ունեցել վիճաբանություն և դանակահարություն։ Տեղեկությունը հայտնում է shamshyan.com–ը։
Նշվում է, որ ժամը 13:30-ի սահմաններում «Սլավմեդ» բժշկական կենտրոնից ահազանգ է ստացվել, որ «աջ կողքի թափանցող կտրած ծակած վերք» և «պարանոցի առաջնային հատվածի կտրած ծակած վերք» վնասվածքներով իրենց մոտ է տեղափոխվել մի քաղաքացի:
Հիվանդանոց մեկնած ոստիկաններին բժիշկները հայտնել են, որ վիրավորն ի վիճակի չէ բացատրություն տալու, քանի որ գտնվում է վիրահատարանում:
«Մինչ բժիշկները պայքարում էին վիրավորի կյանքի համար, ոստիկանները պարզել են, որ նա Երևանի բնակիչ 27-ամյա Արսեն Մ.-ն է, ու մինչ ոստիկանները հիվանդաոցում էին, «Նաիրի» բժշկական կենտրոնից ոստիկանություն ահազանգ է ստացվել, որ իրենց մոտ բուժօգնության է տեղափոխվել «ձախ գոտկային շրջանի կտրած ծակած, արնահոսող վերք» ախտորոշմամբ մի քաղաքացի: Այս ԲԿ ևս մեկնել են ոստիկանության ծառայողներ։ Նրանց նույնպես հայտնել են, որ վիրավորը վիրահատարանում է և ի վիճակի չէ կատարվածի մասին բացատրություն տալու: «Նաիրի»–ում գտնվող անձն էլ Երևանի բնակիչ 43-ամյա Կարեն Կ.-ն է»,– հայտնում է կայքը:
Ոստիկանության ձեռնարկած օպերատիվ հետախուզական միջոցառումների շնորհիվ պարզվել է, որ այսօր ժամը 12:50-ի սահմաններում «Սլավմեդ» բժշկական կենտրոն տեղափոխված Արսեն Մ.-ն, Երևանի բնակիչ 32-ամյա Տիգրան Կ.-ն և ևս մեկ անձ, որի ինքնությունը պարզվում է, Արսեն Մ.-ի ավտոմեքենայով գնացել են Բաղրամյան 40 հասցեում գտնվող Հայաստանի Ամերիկյան համալսարանի մոտ։ Այնտեղ «Mercedes GLS» և «Toyota Corolla» մակնիշների ավտոմեքենաներով նշված վայր են եկել Երևանի բնակիչ 29-ամյա Ռուբեն Գ.-ն, «Նաիրի» բժշկական կենտրոն տեղափոխված Կարեն Կ.-ն և ինքնությունը դեռևս չպարզված 2 այլ անձ:
Նշվում է, որ արդեն համալսարանի բակում կենցաղային հարցի շուրջ ծագած վիճաբանության ժամանակ անհայտ անձը իր մոտ պահվող սուր կտրող, ծակող առարկայով հարվածել և մարմնական վնասվածքներ է պատճառել Կարեն Կ.-ին, իսկ կռվի մասնակիցներից Ռուբեն Գ.-ն իր մոտ պահվող սուր կտրող, ծակող առարկայով հարվածել և մարմնական վնասվածք է պատճառել Արսեն Մ.-ին, ապա դեպքի վայրից բոլորը դիմել են փախուստի:
Դեպքի փաստով նախաձեռնվել է քրեական վարույթ:
Ոստիկանությունն ու քննչական բաժինը ձեռնարկում են անհրաժեշտ օպերատիվ - հետախուզական և քննչական համատեղ գործողություններ՝ դեպքի հանգամանքները, կռվի մյուս մասնակիցների ինքնությունը պարզելու, նրանց և հանցագործության գործիք առարկաները հայտնաբերելու ուղղությամբ: