ԵՐԵՎԱՆ, 18 ապրիլի - Sputnik. Նոր պղնձաձուլական գործարանի կառուցման շուրջ բանակցություններ ընթանում են առնվազն երեք ներդրողների հետ։ Այս մասին Ազգային ժողովում հայտարարեց ՀՀ վարչապետ Նիկոլ Փաշինյանը՝ ներկայացնելով կառավարության 2022 թվականի գործունեության հաշվետվությունը ։
Նրա խոսքով` նման խոշոր արդյունաբերական համալիրի կառուցումը բարդանում է լոգիստիկայով և Հայաստանի փակ սահմաններով պայմանավորված, սակայն այդ նախագիծը կանգ չի առել, և դրա շուրջ բանակցությունները շարունակվում են։
«Մեր տնտեսության կարևորագույն խնդիրներից մեկը տնտեսության բարդության աստիճանը բարձրացնելն է։ Դա նշանակում է հետևյալը, որ եթե հիմա մենք պղնձի խտանյութ ենք ստանում և արտահանում, մեր խնդիրը չպետք է լինի միայն պղնձի խտանյութը արտահանելը, այլ այն նաև ձուլելը։ Դրանից հետո մեր խնդիրը ոչ միայն ձուլակտոր, այլ նաև պղնձալար արտահանելն է, որից հետո, օրինակ, արևային պանելներ արտահանելն է, որովհետև պղինձը արևային պանելների ամենակարևոր բաղադրիչներից մեկն է։ Եվ չիպեր արտադրել, էլեկտրաշարժիչների և էլոկտրոմոբիլմների կոմպոնենտներ արտադրել, և այդ խնդիրը կա։ Բայց այստեղ էլ մենք էլի պետք է անկեղծ խոսենք` շատ բարդ է դա անել փակ ճանապարհներով»,–ասում է Փաշինյանը։
Նա հիշեցրեց, որ պոտենցիալ ներդրողների հետ բանակցությունների մասին հայտարարել են էկոնոմիկայի նախարար Վահան Քերոբյանն ու փոխվարչապետ Մհեր Գրիգորյանը: