ԵՐԵՎԱՆ, 17 ապրիլի – Sputnik. Մոսկվան աղաղակող փաստ է համարում Չեխիայում արդիականացման փուլում գտնվող մարոկկական տանկերի փոխանցումը Ուկրաինային։ Այդ հայտարարությունն արել է ՌԴ ԱԳՆ պաշտոնական ներկայացուցիչ Մարիա Զախարովան:
Նա նշել է, որ, ըստ ՌԴ-ի տվյալների, դեռևս ռազմական հատուկ գործողության մեկնարկից առաջ Մարոկկոն չեխական «Excalibur Army spol.s r.o.» ընկերության հետ պայմանագիր էր կնքել 1999-2001 թվականներին Բելառուսում ձեռք բերված 130 հատ T-72B տանկերի խմբաքանակի արդիականացման համար: Զախարովայի խոսքով՝ համապատասխան աշխատանքներից հետո 56 տանկ վերադարձվել է Մարոկկոյին, իսկ մնացած զրահատեխնիկան՝ 74 հատ, փաստացի բռնագրավել է չեխական կողմը՝ հետագայում Ուկրաինայում ռազմական գործողությունների գոտի տեղափոխելու համար։
«Ընդ որում` մարոկկացիներին, ըստ էության, փաստի առաջ են կանգնեցրել։ Միաժամանակ բելառուսցիներին էլ մեղավոր են սարքել առանց մատակարարի համաձայնության դրանք երրորդ երկրներին չփոխանցելու պարտավորությունը չկատարելու համար, ինչը նախատեսված է այդ տանկերի ձեռքբերման պայմանագրի պայմաններով»,-ասված է Զախարովայի հայտարարության մեջ, որը հրապարակվել է ԱԳՆ-ի կայքում։
Ռուսաստանն այս դեպքը դիտարկում է որպես Չեխիայի իշխանությունների վարած թշնամական հակառուսական քաղաքականության ևս մեկ վկայություն, որի շրջանակում Պրահայում չեն ամաչում զենքի առևտուրը կարգավորող միջազգային իրավունքի հիմնարար նորմերը խախտելու և ուրիշի սեփականությունը զավթելուց։
Ռուսաստանն ավելի վաղ ՆԱՏՕ-ի երկրներին բողոքի նոտա էր հղել Ուկրաինային ռազմամթերք մատակարարելու համար։ ՌԴ ԱԳ նախարար Սերգեյ Լավրովը նշել էր, որ ցանկացած բեռ, որն Ուկրաինայի համար նախատեսված ռազմամթերք կպարունակի, Ռուսաստանի համար օրինական թիրախ կդառնա։ ՌԴ արտաքին քաղաքական գերատեսչությունում հայտարարել էին, որ ՆԱՏՕ-ի երկրները, Ուկրաինային ռազմամթերք մատակարարելով, կրակի հետ են խաղում։ ՌԴ նախագահի մամուլի խոսնակ Դմիտրի Պեսկովն ընդգծել էր, որ Արևմուտքի կողմից Ուկրաինային զենք տրամադրելը չի նպաստում ռուս-ուկրաինական բանակցությունների հաջողությանը և բացասական ազդեցություն է թողնում։