ԵՐԵՎԱՆ, 17 ապրիլի – Sputnik. Զինվորի տանն էլի տոն է սպասվում. 44-օրյա պատերազմի մասնակից Արամ Թերզյանը սիրելիին` Ռիմային, ամուսնության առաջարկ արեց խորհրդանշական վայրում։ Գեղեցիկ այս իրադարձության մասին տեսանյութ է հրապարակել Զինվորի տան լրատվական բաժինը։
44-օրյա պատերազմի լուրը ստանալուն պես ՌԴ–ում բնակվող Արամը շտապել է հայրենիք վերադառնալ։ Մայրը ճանապարհել էԱրամին իր օրհնությամբ և այն աղոթագրքով, որը գրեթե 3 տասնամյակ առաջ` Արցախյան առաջին պատերազմի ժամանակ, Արամի հոր կյանքն էր փրկել։
Պատերազմի ժամանակ աղոթագիրքն Արամի ծոցագրպանում էր, թշնամու փամփուշտը մահացու կլիներ, եթե հենց ծոցագրպանի աղոթագիրքը չշեղեր փամփուշտի ուղղությունը։Ամենախիզախ, գեղեցիկ հարսանիքը․
Նախորդ տարի Թերզյանների ընտանիքը որոշեց աղոթագիրքը նվիրել Զինվորի տանը, որպեսզի այն պահվի մատուռում։ Եվ հենց Զինվորի տան մատուռում` իր կյանքը փրկած աղոթագրքի մոտ էլ Արամն ամուսնության առաջարկ արեց Ռիմային։