ԵՐԵՎԱՆ, 17 ապրիլի – Sputnik. Հայաստանում ՌԴ Հարավային ռազմական օկրուգի ռազմակայանի զինծառայողներն ավարտել են ձմեռային ստուգատեսը։ Այս մասին հայտնում է օկրուգի մամուլի ծառայությունը։
«Էրեբունի» օդանավակայանի թռիչքային անձնակազմը ցուցադրել է տարբեր բարձրությունների վրա, այդ թվում` բարձրլեռնային շրջաններում, պիլոտաժի հմտությունները, իսկ օպերատիվ–մարտավարական ավիացիայի օդաչուները կատարել են պայմանական հակառակորդի օդային թիրախների, հակաօդային պաշտպանության խոցման խնդիրները, ինչպես նաև կանխել օդանավակայանին ուղղված օդահրթիռային հարվածը։
Բանակային ավիացիայի անձնակազմերն օրվա մութ ժամերին սարքերով իրականացրել են տեղանքի հետախուզություն, ուժերի տեղափոխում պահեստային օդանավակայան և Ալագյազ զորավարժարանում կրակային աջակցություն են ցուցաբերել զորամիավորումների ստորաբաժանումներին։
Հայաստանում ՌԴ Հարավային ռազմական օկրուգի ռազմակայանի զինվորականները անվային և զրահատանկային տեխնիկայի վարման ստուգարքային վարժություններ են կատարել, մարտական հրաձգություն իրականացրել զենքից և զինտեխնիկայից, ավելի քան 100 նորմատիվ հանձնել մարտավարական, հատուկ, ինժեներային, բժշկական, ֆիզիկական պատրաստության, ռադիացիոն, քիմիական և կենսաբանական պաշտպանության վերաբերյալ։
Հայտնում են, որ ռազմակայանի հրամանատարությունը բարձր է գնահատել զորամիավորման անձնակազմի մարտական պատրաստության մակարդակը, ինչպես նաև սպառազինության և զինտեխնիկայի վիճակը։