ԵՐԵՎԱՆ, 17 ապրիլի – Sputnik. Հայաստանը դեպի Ռուսաստան կաթնամթերքի մատակարարումների դադարեցումից հետո կպատրաստի այն արտադրողների ցուցակը, որոնք կկարողանան պահպանել ՌԴ պահանջները։ Տեղեկությունը հայտնում է ՌԻԱ Նովոստին` հղում անելով Ռոսսելխոզնադզորին։
Համապատասխան տեսչական ստուգման արդյունքների հիման վրա որոշում կկայացվի։
«Ստեղծված իրավիճակը կարգավորելու և գերատեսչությունների միջև վստահության նախկին մակարդակը վերադարձնելու համար կողմերը պայմանավորվել են փուլային աշխատանք իրականացնել։ Հայաստանը ստուգելու է հայկական ընկերությունները և ուղարկելու է այն ձեռնարկությունների անունները, որոնք կարող են կատարել ռուսական պահանջները։ Ռոսսելխոզնադզորը ստուգումներ կանցկացնի և արդյունքների հիման վրա որոշում կկայացնի Ռուսաստանի հետ առևտուրը թույլատրելու մասին», - նշված է հաղորդագրության մեջ:
Ռոսսելխոզնադզորի ղեկավարը նաև ընդգծել է, որ Ռուսաստանը լիովին ապահովված է կաթնամթերքով, որը մատակարարվում է նաև արտաքին շուկաներ։ Ուստի ՌԴ-ն կարող է շահագրգռված լինել հայկական խոհանոցի համար ավանդական և բացառապես հայկական հումքից պատրաստված իրական ապրանքների գնումներով:
Ավելի վաղ Ռոսսելխոզնադզորը հայտարարել էր, որ կքննարկի Հայաստանից Ռուսաստան կաթնամթերքի ներմուծման սահմանափակումների հարցը հայկական կողմի վատ վերահսկողության և սահմանափակող միջոցների խախտման պատճառով։ Հայկական կողմից ստացված տեղեկությունների համաձայն՝ Հայաստանի կաթի վերամշակման ձեռնարկություններն օգտագործում են Իրանի Իսլամական Հանրապետության ձեռնարկությունների արտադրած հումքը, ինչի նկատմամբ Ռոսսելխոզնադզորը սահմանափակող միջոցներ է կիրառել։