ԵՐԵՎԱՆ, 17 ապրիլի - Sputnik. Խորվաթիայի մայրաքաղաք Զագրեբում ընթացող ըմբշամարտի Եվրոպայի առաջնությունում Հայաստանը ներկայացնող Վազգեն Թևանյանը 4:1հաշվով հաղթեց ադրբեջանցի մրցակցին ու դուրս եկավ կիսաեզրափակիչ:
Տեղեկությունը հայտնում է Հայաստանի ըմբշամարտի ֆեդերացիայի մամուլի ծառայությունը։
Կիսաեզրափակիչում Վազգեն Թևանյանը մրցելու է Ուկրաինան ներկայացնող մեր հայրենակից Էրիկ Առուշանյանի հետ։
Կիսաեզրափակիչ է դուրս եկել նաև 79կգ քաշային Արման Ավագյանը, որը երկու հաղթանակ տոնելուց հետո եզրափակիչի ուղեգիրը վիճարկելու է հույն Գեորգիոս Կուգիումցիդիսի հետ։
Հիշեցնենք՝ մեկնարկային փուլում Հայաստանի ներկայացուցիչ Արման Ավագյանը (79 կգ) մեկնարկային գոտեմարտում 5։1 հաշվով հաղթել էր բուլղարացի Միխայիլ Իլիև Գերգիևին։
65 կգ քաշային կարգում Վազգեն Թևանյանն էլ խոշոր՝ 10:0 հաշվով հաղթել էր իսրայելցի Ջոշուա Ստյուարտ Ֆինեսիլվերին:
Ըմբշամարտի Եվրոպայի առաջնությունը անցկացվում է ապրիլի 17-23-ը։
Հայաստանը ներկայացնում են Մանվել Խնձրցյանը(57 կգ), Արսեն Հարությունյանը(61 կգ), Վազգեն Թևանյանը (65 կգ), Արման Անդրեասյանը(70 կգ), Հրայր Ալիխանյանը(74 կգ), Արման Ավագյանը (79 կգ), Մուշեղ Մկրտչյանը (86 կգ), Սերգեյ Սարգսյանը (97կգ):