ԵՐԵՎԱՆ, 17 ապրիլի – Sputnik. ՀՀ ԱԽ քարտուղար Արմեն Գրիգորյանն այսօր հանդիպել է ԱՄՆ պետքարտուղարի Եվրոպական ու Եվրասիական հարցերով փոխտեղակալ Էրիկա Օլսոնի հետ: Այս մասին նա գրել է իր ֆեյսբուքյան էջում։
Զրուցակիցները բարձր են գնահատել հայ-ամերիկյան հարաբերությունների կայուն զարգացման դինամիկան՝ փաստելով վերջին շրջանում առավել ակտիվացած փոխայցերը:
Գրիգորյանն ու Օլսոնը քննարկել են հայ-ամերիկյան համատեղ ծրագրերի իրականացման ընթացքը և մի շարք ոլորտներում համագործակցության հնարավոր հեռանկարները:
Կարևորել են հայ-ամերիկյան փոխգործակցության հետագա ամրապնդումը նաև տարածաշրջանում կայունության և խաղաղության ապահովման համատեքստում:
Ավելի վաղ հայտնել էինք, որ ԱՄՆ պետքարտուղարի փոխտեղակալ Էրիկա Օլսոնը երկօրյա այցով ժամանել է Հայաստան։ Նախատեսվում է հանդիպում նաև ՀՀ վարչապետ Նիկոլ Փաշինյանի հետ։