ԵՐԵՎԱՆ, 16 ապրիլի – Sputnik. Հայաստանի տնտեսական քաղաքականության առանցքային նպատակն է ունենալ այնպիսի տնտեսություն, որն ի վիճակի կլինի գեներացնել անկախ, ինքնիշխան, մրցունակ պետություն ունենալու համար անհրաժեշտ ռեսուրսներ: Այս մասին Դիլիջանում՝ Կենտրոնական բանկի ուսումնահետազոտական կենտրոնում,հայտարարել է ՀՀ վարչապետ Նիկոլ Փաշինյանը` ամփոփելով վարչապետին կից տնտեսական քաղաքականության խորհրդի երկօրյա նիստի աշխատանքները, հայտնում են կառավարությունից։
Այս առումով վարչապետն էական է համարել այն ներդրումները և ռազմավարությունները, որոնք առկա են կրթության ոլորտում, որովհետև առանց կրթության ոլորտի ներդրումների այդ նպատակն իրագործելի չի լինի:
Փաշինյանի խոսքով` հաջորդ ֆունդամենտալ, հայեցակարգային խնդիրը հարկային կամ հարկ վճարողների կողմից նոր մենթալիտետի որդեգրումն է։
«Մեր կարևոր նպատակն է, որ ՀՀ քաղաքացիները և ռեզիդենտները մեծ հաշվով հարկերն ընկալեն ոչ թե սեփական գրպանից ուրիշի գրպան ֆինանսական միջոցների արտահոսք, այլ աջ գրպանից ձախ գրպան տեղափոխում»,–ասել է նա:
Նա ընդգծել է, որ երբ քաղաքացին ունենա որոշակի համոզվածություն, որ իր գեներացրած միջոցները կոռուպցիոն գործարքների միջոցով չեն փոշիացվում, այդ ժամանակ հարկային նոր մտածողությունը կորդեգրի:
Վարչապետը խոսել է նաև համընդհանուր հայտարարագրման մեխանիզմի մասին, որը պատրաստվում են առաջիկայում ներդնել:
Նա ընդգծել է, որ կարևորագույն նպատակներից մեկն այն է, որ քաղաքացիների համընդհանուր հայտարարագրման մեխանիզմը ոչ միայն պարտավորություններ և պարտականություններ դնի քաղաքացիների վրա, այլև նրանց համար հնարավորություններ ստեղծի, այդ թվում` սոցիալական ուղղություններով` կրթության, առողջապահության որոշակի ծախսեր անելու իմաստով: