ԵՐԵՎԱՆ, 14 ապրիլի – Sputnik. Վլադիմիր Գասպարյանի թիկնազորի նախկին պետ Արշակ Հակոբյանի կալանավորման ժամկետը 3 ամսով երկարացվել է։ Այս մասին տեղեկանում ենք Դատական իշխանության Telegram-յան էջից։
Հակակոռուպցիոն դատարանի դատավոր Վարդգես Սարգսյանը մերժել է ոստիկանության կազմակերպված հանցավորության դեմ պայքարի գլխավոր վարչության 5-րդ բաժնի պետի պաշտոնը զբաղեցրած Արշակ Հակոբյանի խափանման միջոցը փոխելու վերաբերյալ միջնորդությունը և երկարացրել կալանքի տակ մնալու ժամկետը։
Ի դեպ, դատարանը նախնական դատալսումների փուլը հայտարարել է ավարտված և անցել է հիմնական փուլին։
Հաջորդ դատական լսումները նշանակվել են ապրիլի 19-ին, ժամը 16։00-ին, որի ժամանակ հարցաքննության կհրավիրվեն 5 վկաներ։ Առաջինը կհարցաքննվի Վլադիմիր Գասպարյանը։
Հիշեցնենք` ՔԿ–ն 2021 թ.-ի նոյեմբերի 30-ին հայտնել էր, որ Արշակ Հակոբյանը կալանավորվել է։ Ավելի ուշ նա գրավով ազատ էր արձակվել։
ՀՀ վճռաբեկ դատարանի 2022թ.–ի դեկտեմբերի 23-ի որոշմամբ` նրա նկատմամբ կրկին խափանման միջոց էր ընտրվել կալանքը, իսկ այլընտրանքային խափանման միջոցի կիրառումն անբավարար էր ճանաչվել։
Արշակ Հակոբյանին ևս մեկ ամիս կալանքի տակ պահելու որոշում Հակակոռուպցիոն դատարանը ընդունել էր 2023 թ.–ի հունվարի 18-ին։ Իսկ փետրվարին կալանքի ժամկետը երկարաձգվել է ևս 2 ամսով։
Իսկ 2023թ.–ի մարտի 17–ին Արշակ Հակոբյանի մեղադրանքը փոփոխվել էր։
Հսկող դատախազի որոշմամբ` նրա նկատմամբ հարուցվել է նոր քրեական հետապնդում ՀՀ քրեական նախկին օրենսգրքի 190-րդ հոդվածի 3-րդ մասի 1-ին կետով` փողերի լվացման և 314.3-րդ հոդվածի 2-րդ մասով` հայտարարագրման ենթակա տվյալը թաքցնելու համար։
Ավելի վաղ նրան մեղադրանք էր առաջադրվել հայտարարագրման ենթակա առանձնապես խոշոր չափերով գույքը դիտավորությամբ թաքցնելու և հանցավոր ճանապարհով ստացված առանձնապես խոշոր չափերով գույքի օրինականացման համար։