ԵՐԵՎԱՆ, 14 ապրիլի – Sputnik. Տեղ համայնքում իրականացված սադրանքն Ադրբեջանի հերթական ոտնձգությունն է ՀՀ տարածքային ամբողջականության դեմ: ԱՊՀ մասնակից պետությունների միջխորհրդարանական վեհաժողովի լիագումար նիստի իր ելույթում այս մասին ասել է ԱԺ նախագահ Ալեն Սիմոնյանը, տեղեկանում ենք ԱԺ կայքից։
Նա հիշեցրել է, որ ապրիլի 11-ին ՀՀ ինքնիշխան տարածքում ադրբեջանական ԶՈւ–ի մի խումբ զինծառայողներ սահմանային անցակետերը ճշտելու պատրվակով մոտեցել են ինժեներական աշխատանքներ իրականացնող զինվորներին, հրազենից, ապա նաև խոշոր տրամաչափի զենքից կրակ բացել: Սիմոնյանն ասել է, որ ադրբեջանցի զինվորականների բոլոր գործողությունները փաստագրված են օպերատիվ տեսանկարահանմամբ, որը հասանելի է համացանցում:
«Ադրբեջանի այս քաղաքականությունը նոր չէ, այն 2021-ի մայիսին և նոյեմբերին, ինչպես նաև 2022-ի սեպտեմբերին ՀՀ–ի վրա իրականացված հարձակումների շարունակությունն է, որի արդյունքում Ադրբեջանն օկուպացրել է Հայաստանի ինքնիշխան տարածքները: Պետք է արձանագրեմ, որ նշված հատվածում Բաքվի գործողությունները սադրիչ են և հակասում են 2022 թվականի հոկտեմբերի 6-ին Պրահայում և հոկտեմբերի 31-ին Սոչիում կայացած հանդիպումների արդյունքում ընդունված համատեղ հայտարարություններին»,–ասել է Սիմոնյանը։
Նա նշել է, որ անհրաժեշտ է իրականացնել երկու կողմերի զինված ուժերի հետքաշումը սահմանից անվտանգ հեռավորության վրա՝ որպես իրավիճակի կայունության հուսալի երաշխիք: Սիմոնյանը շեշտել է` հայկական կողմն իր պատրաստակամությունն է հայտնում այս հարցում 2021-ից, բացի այդ, նման գործողությունը բխում է Պրահայի քառակողմ և Սոչիի եռակողմ պայմանավորվածությունների տրամաբանությունից:
ԱԺ նախագահը վերահաստատել է` հայկական կողմը, ինչպես և նախկինում, տարածքային պահանջներ չունի իր հարևաններից և ոչ մեկի նկատմամբ, և պատրաստ է տեղում ընթացիկ հարցերը լուծել կառուցողական բանակցությունների միջոցով: Չնայած այս ամենին, Ադրբեջանը պահանջներ է հնչեցնում Հայաստանի Հանրապետության գրեթե ամբողջ ինքնիշխան տարածքի նկատմամբ:
Հիշեցնենք` ապրիլի 11-ին Ադրբեջանի ԶՈւ ստորաբաժանումները կրակ են բացել Տեղ համայնքի ուղղությամբ ինժեներական աշխատանքներ իրականացնող ՀՀ ԶՈւ զինծառայողների ուղղությամբ, հայկական կողմը դիմել է պատասխան գործողությունների: Ժամը 17:30-ի սահմաններում Ադրբեջանի ԶՈւ ստորաբաժանումները կիրառել են ականանետային միջոցներ։ Ադրբեջանական սադրանքի հետևանքով հայկական կողմն ունի 4 զոհ և 6 վիրավոր։