ԵՐԵՎԱՆ,14 ապրիլի — Sputnik. Երևանի Ֆիրդուսի թաղամասի բնակիչները կրկին կառավարության շենքի մոտ են, քանի որ իրենց խնդրի լուծման համար դեռևս պատասխան չեն ստացել։
Նշենք, որ դեռ 2015 թվականին ՀՀ կառավարությունը, ելնելով գերակա հանրային շահից, որոշել է քանդել Ֆիրդուսի թաղամասի մի քանի տներ և պահեստներ։ Բնակիչների մեծ մասը փոխհատուցում է ստացել, սակայն կան բնակիչներ, որոնք փոխհատուցման չափը համարում են անհամաչափ և չեն լքում իրենց տները։
«Մենք մարտի 22-ին դիմում ենք հանձնել կառավարություն`մեր հարցերը կրկին բարձրաձայնելով։ Մեզ պետք է պատասխանեին տասնօրյա ժամկետում, բայց ոչ մի պատասխան չունենք։ Եկել ենք` ասում են դեռ պատրաստ չենք պատասխանել»,– լրագրողների հետ զրույցում ասաց բնակիչներից մեկը։
Նշենք, որ կառավարությունից խոստացել են բնակիչներին ընդունել եկող շաբաթ` պատճառաբանելով, որ փոխվարչապետի գրասենյակի ղեկավար Արման Ադիլխանյանը, որը պետք է նրանց ընդուներ, այսօր տեղում չէ։
Բնակիչները, սակայն, հանդիպում են պահանջում նաև ՀՀ վարչապետ Նիկոլ Փաշինյանի հետ։ Ասում են` բոլոր վարչապետները նախկինում իրենց ընդունել են, սպասում են նաև գործող վարչապետի հետ հանդիպման։
Հիշեցնենք, որ Ֆիրդուսի թաղամասում, որը մոտ 5 հա տարածք է, նախատեսվում է կառուցել նոր բնակելի ՝ «33-րդ» թաղամաս, որտեղ կլինեն բնակելի շենքեր, բիզնես կենտրոններ և հյուրանոցներ։ Հատակագծի հեղինակը Նարեկ Սարգսյանն է (Երևանի նախկին գլխավոր ճարտարապետ,- խմբ.), գլխավոր ճարտարապետը՝ Հովհաննես Մութաֆյանը։
Այս տարվա հունվարի 13–ին Ֆիրդուսի թաղամասում հարկադիր կատարումն ապահովող ծառայության աշխատակիցները կոտրել էին պահեստների և տների դռները` փորձագետների մուտքն այնտեղ ապահովելու համար։ Փորձագետները պետք է գնահատում իրականացնեին` ապահովելու դատարանի կատարողական թերթի կատարումը։ Տների և պահեստների սեփականատերերը թույլ չէին տալիս անշարժ գույքի գնահատող փորձագետին գնահատում իրականացնել, քանի որ չէին հավատում նրա օբյեկտիվությանը։
Հավելենք, որ Երևանի կենտրոնում գտնվող Ֆիրդուսի թաղամասն առաջին անգամ հանրային գերակա շահ հռչակվեց 2008 թվականին, նույն որոշումը վերահաստատվեց նաև 2018 թվականի մարտի 22-ին` «թավշյա հեղափոխությունից» մեկ ամիս առաջ:
Թաղամասի կառուցապատումը նախատեսվում է ավարտել 2023-2024 թվականներին: Ըստ կառուցապատման նախագծի՝ Ֆիրդուսի նոր թաղամասում լինելու են ինչպես բնակելի շենքեր, այնպես էլ հյուրանոցներ ու բիզնես կենտրոններ: