ԵՐԵՎԱՆ, 14 ապրիլի – Sputnik. Հայաստանն առաջ է շարժվում իր պետական շահերով և ամեն ինչ անում է իր զինված ուժերի մարտունակությունը բարձրացնելու համար։ Ազգային ժողովում խորհրդարանական ճեպազրույցների ժամանակ այս հայտարարությունն արեց «Քաղաքացիական պայմանագիր» խմբակցության քարտուղար Արթուր Հովհաննիսյանը՝ արձագանքելով ՌԴ ԱԳՆ պաշտոնական ներկայացուցիչ Մարիա Զախարովայի հայտարարությանը։
Ավելի վաղ Զախարովան հայտարարել էր, որ Մոսկվան ՆԱՏՕ-ի զորավարժություններին մասնակցելու հարցով պաշտոնական պարզաբանում տալու համար դիմել է հայ գործընկերներին: Նա նաև նշել էր, որ ՀՀ տարածքում ՀԱՊԿ զորավարժությունների անցկացումից հրաժարվելը ափսոսանք է առաջացնում և չի նպաստում տարածաշրջանային անվտանգության բարձրացմանը:
«Մի քիչ անհասկանալի է, որ Մարիա Զախարովան Հայաստանից պարզաբանումներ է պահանջում։ Հայաստանի Հանրապետությունն իր ռազմավարական գործընկերոջ՝ Ռուսաստանի հետ շարունակում է ջերմ, բարեկամական ռազմավարական հարաբերությունները, իր ջերմ հարաբերությունները շարունակում է նաև այլ երկրների գործընկերների հետ և ամեն ինչ անում է ի նպաստ ՀՀ զինված ուժերի զարգացման և մարտունակության բարձրացման»,- ասաց Հովհաննիսյանը։
ՔՊ–ական պատգամավոր Անդրանիկ Քոչարյանն էլ անդրադարձավ Զախարովայի այն հայտարարությանը, թե ՌԴ ԶՈւ և ԱԴԾ սահմանապահ ծառայության ներկայացուցիչներն են անհապաղ միջոցներ ձեռնարկել Տեղում լարվածությունը թուլացնելու համար։
«Ես կասկածի տակ չեմ դնում Զախարովայի ասածը, որ ինչ-որ չափով Ռուսաստանը մասնակցել է մարտերի դադարեցման հարցում, բայց ամեն դեպքում կռվել է Հայաստանի ԶՈւ–ն։ Եթե մենք չկռվեինք, զոհեր չտայինք, ՌԴ ԱԳ գերատեսչության զանգերը խնդրի լուծման չէին տանելու։ Խնդիրը լուծվել է բացառապես մեր զինվորականության քաջարի գործողությունների արդյունքում»,–ասաց Քոչարյանը։
Հիշեցնենք` ՀՀ ազգային անվտանգության ծառայությունը մարտի 30-ին հայտնեց, որ ադրբեջանական կողմը կրկին խախտել է պայմանավորվածությունները և մի քանի կետերում տեղակայվել սահմանից 100-300 մետր ավելի առաջ, որոշ տեղերում ադրբեջանական կողմը, չսպասելով նախապես պայմանավորված ճշգրտումներին, սկսել է դիրքավորվել և իրականացնել ինժեներական աշխատանքներ:
ՀՀ ԱԱԾ–ն ապրիլի 1-ին հայտարարեց, որ Տեղ-Կոռնիձոր հատվածում հանդիպում է տեղի ունեցել Հայաստանի և Ադրբեջանի ներկայացուցիչների մասնակցությամբ, և իրականացվել սահմանի ճշգրտման աշխատանքներ, որի արդյունքում տվյալ հատվածում իրավիճակը էականորեն բարելավվել է։
Ապրիլի 11-ին ՊՆ–ն տեղեկացրեց, որ Ադրբեջանի ԶՈւ ստորաբաժանումները կրակ են բացել Տեղ համայնքի ուղղությամբ ինժեներական աշխատանքներ իրականացնող ՀՀ ԶՈւ զինծառայողների ուղղությամբ, հայկական կողմը դիմել է պատասխան գործողությունների: Ժամը 17:30-ի սահմաններում Ադրբեջանի ԶՈւ ստորաբաժանումները կիրառել են ականանետային միջոցներ։ Ադրբեջանական սադրանքի հետևանքով հայկական կողմն ունի 4 զոհ և 6 վիրավոր։