ԵՐԵՎԱՆ, 13 ապրիլի – Sputnik. Տարեցտարի ջրի խնայողությունն ավելի ու ավելի է կարևորվելու, և դրան պետք է պատրաստ լինեն և՛ կոմունալ, և՛ ոռոգման ընկերությունները։ Այս մասին ՀՀ կառավարության նիստում հայտարարեց ՀՀ վարչապետ Նիկոլ Փաշինյանը։
Նրա խոսքով` ջրի պակասը կզգացվի ամբողջ աշխարհում, և Հայաստանը բացառություն չի լինի։
Փաշինյանն ընդգծեց, որ ջրի խնայողությունը պետք է լինի ամենուր` առօրյա կյանքում, գյուղատնտեսությունում, արդյունաբերության մեջ։
Փաշինյանը համապատասխան հանձնարարական տվեց Երևանի փոխքաղաքապետ Տիգրան Ավինյանին, որը ներկա էր նիստին։
«Փողոցների ցայտաղբյուրներին պետք է փականներ դրվեն, ջրի խնայողություն պետք է լինի ամեն օր բոլոր ոլորտներում։ Եթե ոռոգման նոր տեխնոլոգիաներ, ջրի խնայողության նոր տեխնոլոգիաներ չներդրվեն, մենք ունենալու ենք լուրջ խնդիրներ, որոնք մեր լուծման հասանելիությունից դուրս են: Ջրի խնայողության ռեժիմը պետք է ռազմավարական հարց դառնա մեզ համար»,- նշեց վարչապետը։
Փաշինյանը հավելեց, որ հանրապետությունում կառուցվում են նաև ջրամբարներ, այդ թվում՝ փոքր, և այդ աշխատանքները պետք է շարունակվեն։
Նշենք, որ հանրապետության լավագույն մասնագետները կազմել են ջրամբարների քարտեզ։