ԵՐԵՎԱՆ,13 ապրիլի–Sputnik. Արևմտյան ԶԼՄ-ների գործունեության կրճատումից հետո արևմտյան հռետորաբանության դեմ աճող դժգոհության ֆոնին Աֆրիկայում Sputnik-ը և RT-ն արագորեն ժողովրդականություն են ձեռք բերում։ Այս մասին գրում է New York Times-ը:
Նշվում է, որ ֆրանսիական որոշ ԶԼՄ-ների հեռանալուց հետո աֆրիկյան երկրների բնակիչներն ավելի հաճախ են անդրադառնում ռուսական աղբյուրներին, այդ թվում՝ Ուկրաինայում իրավիճակի մասին տեղեկություններ ստանալու համար: Խոսքը, մասնավորապես, RT-ի և Sputnik-ի մասին է։ Թերթի պնդմամբ՝ Ֆրանսիայում RT-ի աշխատանքի դադարեցումից հետո ԶԼՄ-ների ֆրանկոֆոն ստորաբաժանումը մտադիր է ավելի ակտիվ աշխատել Աֆրիկայում: Բացի այդ, պարբերականն ընդգծում է, որ տեղական ԶԼՄ-ները պայմանագրեր են կնքում նաև Sputnik-ի հետ։
«Վերջին մեկ տարվա ընթացքում ռուսամետ կոնտենտիհոսքը գնալով ավելի շատ է հայտնվում աֆրիկյան ԶԼՄ-ներում և սոցիալական ցանցերում»,-նշված է հրատարակության նյութում:
RT-ի գլխավոր խմբագրի տեղակալ Աննա Բելկինան NYT-ին հայտնել է, որ RT-ն ընդլայնում է իր գործունեությունն աֆրիկյան մայրցամաքում՝ զարգացնելով «աֆրիկյան հանգույցն անգլերենով» Յոհանեսբուրգում՝ լուսաբանելու «հնարավորինս լայն պատմություններ, որոնք հետաքրքրություն են ներկայացնում ինչպես տեղական լսարանի, այնպես էլ միջազգային հեռուստադիտողների համար»:
Նա նաև ավելացրել է, որ Արևմուտքը երկար ժամանակ փորձել է սահմանափակել հեռուստաալիքի լրագրողական աշխատանքը։