ԵՐԵՎԱՆ, 13 ապրիլի – Sputnik. Քննչական կոմիտեում այս պահին տվյալներ չկան, որ Զանգեզուրի պղնձամոլիբդենային կոմբինատի աշխատակցին սպանել են ադրբեջանցիները։ Այս մասին Sputnik Արմենիայի թղթակցին հայտնեցին ՀՀ քննչական կոմիտեի մամուլի ծառայությունից ։
Ավելի վաղ հայկական ԶԼՄ-ներում տեղեկություն էր հայտնվել, որ «Զանգեզուրի պղնձամոլիբդենային կոմբինատի» պահակակետում սպանված հայտնաբերված 57-ամյա պահնորդի գործով իրավապահները հիմնական վարկած են դիտարկում ադրբեջանցիների կողմից սպանությունը:
«Այս պահին նման տվյալներ չկան», - ասաց նա:
Աբրահամյանն այդ թեմայով գրառում է արել նաև ֆեյսբուքյան էջում։
«Եթե ենթադրություններից դուրս ոմանք կարող են իրենց հայտնի, որոշակիություն ունեցող տվյալներ ունենալ հանցագործությունն ընդհանրապես կատարողների վերաբերյալ, ապա կարող են ու պարտավոր են հայտնել վարույթն իրականացնող մարմնին»,– նշել է նա։
Հիշեցնենք` սպանությունը կատարվել է Կապան համայնքի Շղարշիկ բնակավայրում գտնվող պահակակետում։ Սպանվածը Սյունիքի մարզի բնակիչ 57-ամյա Հայրապետ Մելիքսեթյանն է։
Ըստ նախնական տեղեկությունների՝ սպանությունը տեղի է ունեցել կենցաղային հողի վրա։ Դատաբժշկական փորձաքննության ընթացքում սպանվածի մարմնի վրա հայտնաբերվել է գլխի և որովայնի շրջանում հրազենային 6 վնասվածք: Սպանության փաստի առթիվ հարուցվել է քրեական գործ։ Կատարվում է քննություն: