ԵՐԵՎԱՆ,12 ապրիլի – Sputnik. Ռուսաստանում չեն նսեմացնում Երևանի ու Բաքվի ուղիղ աշխատանքը և գերազանց են համարում, որ կողմերը պայմանավորվում են ամենաբարդ հարցերի շուրջ։ Այսօրվա ճեպազրույցի ժամանակ այս հայտարարությունն է արել ՌԴ ԱԳՆ պաշտոնական ներկայացուցիչ Մարիա Զախարովան՝ պատասխանելով համապատասխան հարցին:
Իշխող «Քաղաքացիական պայմանագիր» խմբակցության պատգամավոր Արմեն Խաչատրյանն ավելի վաղ հայտարարել էր, որ Տեղ գյուղի մոտակայքում մարտական գործողությունների դադարեցման որևէ միջնորդություն չի եղել, դադարեցվել է ՀՀ և նրանց ուժային ներկայացուցիչների միջև խոսակցությունների և բանակցությունների արդյունքում։ Զախարովան էլ ասել էր, որ ՌԴ ԶՈւ և ԱԴԾ սահմանապահ ծառայության ներկայացուցիչներն են անհապաղ միջոցներ ձեռնարկել լարվածությունը թուլացնելու համար։
«Ես ասացի մեր աջակցության մասին, և երևի ամեն դեպքում իրավիճակի հանգուցալուծմանն ուղղված մեր աջակցությունը պետք է մեկնաբանվի ոչ միայն ու ոչ այնքան քաղաքական շարժումների առանձին ներկայացուցիչների, այլև գործադիր իշխանության ներկայացուցիչների կողմից, որոնք պատասխանատու են այդ ուղղության համար»,- ասել է Զախարովան:
Նրա խոսքով՝ ինքը կարող է համաձայնել կամ չհամաձայնել այդ գնահատականներին։
«Որքան մարդ կա, այնքան կարծիք»,– նշել է Զախարովան:
Հիշեցնենք` Ադրբեջանի ԶՈւ ստորաբաժանումներն ապրիլի 11-ին` ժամը 16:00-ի սահմաններում, կրակ են բացել Տեղ համայնքի ուղղությամբ ինժեներական աշխատանքներ իրականացնող ՀՀ ԶՈւ զինծառայողների ուղղությամբ, հայկական կողմը դիմել է պատասխան գործողությունների:
Ժամը 17:30-ի սահմաններում Ադրբեջանի ԶՈւ ստորաբաժանումները կիրառել են ականանետային միջոցներ։ Ադրբեջանական սադրանքի հետևանքով հայկական կողմն ունի 4 զոհ և 6 վիրավոր։