Եվրախորհրդարանում կոռուպցիայի գործի մասնակիցներին բաց են թողնում էլեկտրոնային թևնոցներով

ԵՐԵՎԱՆ,12 ապրիլի – Sputnik. Եվրախորհրդարանում կոռուպցիայի գործի՝ այսպես կոչված «կատարգեյթի» մասնակից, նախկին փոխնախագահ, ազգությամբ հույն Եվա Կայլին դուրս կգա բանտից և հսկողության տակ կմնա էլեկտրոնային թևնոցով: Տեղեկությունը հայտնում է «Ինտերֆաքսը»՝ հղում անելով RTBF հեռուստաալիքին։

Նման որոշում է կայացրել դատական քննիչ Միշել Քլեզը՝ հղում անելով Բելգիայի դաշնային դատախազությանը։

Կայլիի դեմ, որն անցյալ տարվա դեկտեմբերի 10-ից կալանքի տակ էր գտնվում, մեղադրանքներ են առաջադրվել կոռուպցիայի, փողերի լվացման և հանցավոր կազմակերպությանը պատկանելու համար։

Ամենասկզբից Կայլին հերքում էր իր մեղքը։ Նա հնարավորություն չի ունեցել օգտվել խորհրդարանականի անձեռնմխելիությունից, քանի որ Եվրախորհրդարանը համարել է, որ նա ձերբակալվել է հանցանքի վայրում. նրա բնակարանում թղթադրամներով պայուսակներ են գտել։

Նախօրեին Բրյուսելի փաստաբանները հայտարարել են «կատարգեյթի» մեկ այլ ֆիգուրանտի՝ բելգիացի նախկին եվրապատգամավոր Մարկ Տարաբելլային ազատելու` դատական իշխանության որոշման մասին։ Նա նույնպես մշտապես հայտարարել է իր անմեղության մասին:

Անցյալ շաբաթ Euronews հեռուստաալիքը հայտնել էր, որ էլեկտրոնային թևնոցով ազատ կարձակվի նաև իտալացի սոցիալիստներից Եվրախորհրդարանի նախկին անդամ Պիեռ Անտոնիո Պանցերին, որին համարում են հանցավոր խմբի ոգեշնչողը, և որը գործարքի է գնացել հետաքննության հետ՝ իրեն սպառնացող բանտարկությանը ժամկետը կրճատելու համար: