ԵՐԵՎԱՆ, 12 ապրիլի – Sputnik. ՀՀ Ազգային ժողովը մեկ րոպե լռությամբ հարգեց ապրիլի 11-ին ադրբեջանական կողմի սադրանքի հետևանքով զոհված հայ զինծառայողների հիշատակը:
ԱԺ փոխխոսնակ Ռուբեն Ռուբինյանը հայտարարեց, որ ՀՀ զինված ուժերը ձեռնարկել են անհրաժեշտ միջացառումներ ՀՀ ինքնիշխան տարածքը պաշտպանելու ուղղությամբ:
«Վարել են անձնազոհ մարտ, թշնամուն պատճառել են զգալի վնասներ, հակառակորդն ունի մեծաթիվ զոհեր ու վիրավորներ»,- ասաց Ռուբեն Ռուբինյանը:
Այնուհետ վարման կարգով ելույթ ունեցավ «Հայաստան» խմբակցության քարտուղար Արծվիկ Մինասյանը ու առաջարկեց ԱԺ հրավիրել Զինված ուժերի ղեկավար կազմին կամ իրավասու անձանց՝ պատգամավորների հետ քննարկում իրականացնելու համար։
Ռուբեն Ռուբինյանը հետաքրքրվեց՝ փա՞կ, թե՞ բաց քննարկում են առաջարկում կազմակերպել:
«Ձևաչափը կարևոր չէ, թեկուզ փակ, բայց, ըստ էության, հասկանալու իրավիճակը»,-պատասխանեց Արծվիկ Մինասյանը:
Ռուբեն Ռուբինյանն էլ հիշեցրեց, որ այսօր կառավարության հետ հարցուպատասխան է լինելու։
«Ղեկավարությունը այստեղ է լինելու այսօր, իսկ եթե փակ քննարկում եք ակնկալում, ապա ես պատրաստ եմ խոսել համապատասխան գերատեսչությունների հետ»,– ասաց Ռուբեն Ռուբինյանը։
Որոշում կայացվեց աշխատանքային կարգով քննարկել այս հարցը։
Հիշեցնենք` Ադրբեջանի ԶՈւ ստորաբաժանումներն ապրիլի 11-ին` ժամը 16:00-ի սահմաններում, կրակ են բացել Տեղ համայնքի ուղղությամբ ինժեներական աշխատանքներ իրականացնող ՀՀ ԶՈւ զինծառայողների ուղղությամբ, հայկական կողմը դիմել է պատասխան գործողությունների:
Ժամը 17:30-ի սահմաններում Ադրբեջանի ԶՈւ ստորաբաժանումները կիրառել են ականանետային միջոցներ։ Ադրբեջանական սադրանքի հետևանքով հայկական կողմն ունի 4 զոհ և 6 վիրավոր։