ԵՐԵՎԱՆ,11 ապրիլիի – Sputnik. Լեհաստանը մտադիր է ֆինանսական հանգույց դառնալ Ուկրաինայի վերականգնման համար միջոցներ հայթայթելու համար։ Տեղեկությունը RMF 24 ռադիոյի եթերում հայտնել է երկրի ֆինանսների փոխնախարար Արթուր Սոբոնը։
«Ճիշտ այնպես, ինչպես Լեհաստանը կատարում էր ռազմական հանգույցի դերը, եթե խոսենք Ուկրաինային ցուցաբերվող ռազմական օգնության մասին, մենք կցանկանայինք, որ այն նաև դառնա ֆինանսական հանգույց, որի միջոցով կընթանա Ուկրաինայի վերականգնման ֆինանսավորումը», - ասել է նա:
Վերջերս Լեհաստանի նախագահ Անջեյ Դուդան հայտնել էր, որ իր երկիրն Ուկրաինային տրամադրվող զենքի ծավալով երրորդ մատակարարն է՝ ԱՄՆ-ից և Մեծ Բրիտանիայից հետո:
Ռուսաստանն ավելի վաղ ՆԱՏՕ-ի երկրներին բողոքի նոտա էր հղել Ուկրաինային ռազմամթերք մատակարարելու համար։ ՌԴ ԱԳ նախարար Սերգեյ Լավրովը նշել էր, որ ցանկացած բեռ, որն Ուկրաինայի համար նախատեսված ռազմամթերք կպարունակի, Ռուսաստանի համար օրինական թիրախ կդառնա։ ՌԴ արտաքին քաղաքական գերատեսչությունում հայտարարել էին, որ ՆԱՏՕ-ի երկրները, Ուկրաինային ռազմամթերք մատակարարելով, կրակի հետ են խաղում։