ԵՐԵՎԱՆ, 10 ապրիլի – Sputnik. Եվրասիական տնտեսական հանձնաժողովը սննդամթերքում հակաբիոտիկների վերահսկման ավելի խիստ նորմեր է նախապատրաստել։ Այս մասին Sputnik Արմենիա մամուլի կենտրոնում միջազգային տեսակապի ժամանակ հայտարարեց տեխնիկական կարգավորման գծով Եվրասիական տնտեսական հանձնաժողովի նախարար Վիկտոր Նազարենկոն։
Նրա խոսքով`աշխարհում հակաբիոտիկների պարունակությունը չափորոշվում է միայն հումքի մեջ (օրինակ` մսի)։ Եվրասիական հանձնաժողովը որոշում է կայացրել հակաբիոտիկների պարունակությանը հետևել նաև վերամշակված արտադրանքում։
Բանն այն է, որ ԵԱՏՄ երկրները նման արտադրանքի մեծ խմբաքանակներ են ներկրում, իսկ հետո ստիպված են լինում հետևել, որպեսզի հակաբիոտիկների պարունակությունը չգերազանցի նորման ոչ միայն հումքի, այլև պատրաստի արտադրանքի մեջ, հավելեց Նազարենկոն։
Նա նշեց, որ վերջին մի քանի տարվա ընթացքում զգալի աշխատանք է տարվել ավելի քան 70 տեսակի հակաբիոտիկների կանոնակարգման ուղղությամբ։
Աշխատանքի ընթացքում առաջացած վիճահարույց հարցերը կքննարկվեն Մոսկվայում ապրիլի 21-ին կայանալիք Եվրասիական տնտեսական հանձնաժողովի խորհրդի նիստում։ Այդ քննարկումների արդյունքներով կողմերը մտադիր են փոփոխություններ ընդունել 2023 թվականի երկրորդ կամ երրորդ եռամսյակում։