ԵՐԵՎԱՆ,10 ապրիլի – Sputnik. Եվրասիական միությունում նախատեսվում է էլեկտրոնային անձնագրերի միասնական համակարգ ստեղծել։ Տեղեկությունը Sputnik Արմենիա մուլտիմեդիոն կենտրոնում կայացած միջազգային տեսաակամուրջի ժամանակ հայտնել է Եվրասիական տնտեսական հանձնաժողովի (ԵՏՀ) տեխնիկական կարգավորման հարցերով նախարար Վիկտոր Նազարենկոն։
Նախարարը նշել է, որ մեքենաների էլեկտրոնային անձնագրերի տրամադրման գործընթացն արդեն զգալի առաջընթաց է գրանցել Ռուսաստանում, նման համակարգեր ստեղծվում են նաև Բելառուսում ու Ղազախստանում: Այժմ խնդիր է դրված ազգային համակարգերը միավորել մեկ վերազգային համակարգի մեջ։
Հայաստանն ու Ղրղզստանը պատրաստվում են ռուսական համակարգն օգտագործել լիցենզային համաձայնագրի հիման վրա։ Նազարենկոն ավելացրել է, որ որքան հայտնի է` ԵՏՀ-ում Ղրղզստանը պատրաստվում է հետագայում իր համակարգը ստեղծել։
«Նման անձնագիր ունենալու դեպքում մեր մի հանրապետությունից մյուսը տեղափոխվող քաղաքացիները կարող են հնարավորինս պարզեցված կարգով վաճառել մեքենան, վերաձևակերպել այն, այլ գործարքներ կատարել։ Ամբողջ տեղեկատվությունը թափանցիկ կլինի, հեշտ կստուգվի», - ասել է Նազարենկոն։
Առաջնահերթ կարգով Եվրասիական հանձնաժողովն ուզում է էլեկտրոնային անձնագրեր գործարկել այն մեքենաների համար, որոնք տեղափոխվում են միության երկրների միջև։ Օրինակ՝ արտահանվում են կամ փոխադրվում են մի երկրից մյուսը: