ԵՐԵՎԱՆ, 10 ապրիլի - Sputnik. Բոլորն ականատես են եղել Չինաստանի նկատմամբ սադրիչ գործողություններին։ Այսպիսի հայտարարություն է արել Ռուսաստանի նախագահի մամուլի քարտուղար Դմիտրի Պեսկովը:
«Մենք բոլորս շատ կարճ ժամանակահատվածում ականատես ենք եղել բազմաթիվ գործողությունների, որոնք սադրիչ բնույթ են կրել Չինաստանի Ժողովրդական Հանրապետության նկատմամբ։ Իհարկե, Չինաստանն ինքնիշխան իրավունք ունի արձագանքել այդ սադրիչ գործողություններին, այդ թվում ռազմական մանևրներ անցկացնել միջազգային օրենսդրությանը համապատասխան, և բոլորը պետք է հարգեն Չինաստանի, ինչպես և մյուս երկրների` նման գործողությունների դիմելու իրավունքը»,-ասել է Պեսկովը։
Ապրիլի 8–ին Չինաստանի Ժողովրդական ազատագրական բանակի մարտական հրամանատարության Արևելյան գոտու պաշտոնական ներկայացուցիչ Շի Ին հայտնել էր, որ Չինաստանի զինված ուժերն ապրիլի 8-10-ը մարտական պատրաստության պլանի համաձայն զորավարժություններ և պարեկություն են անցկացնում Թայվանի շրջակայքում գտնվող ծովային ջրային և օդային տարածքներում:
Հիշեցնենք` ՉԺՀ կենտրոնական կառավարության և նրա նահանգի միջև պաշտոնական հարաբերություններն ընդհատվել են 1949 թվականին, երբ Չինաստանի Կոմկուսի հետ քաղաքացիական պատերազմում պարտված Գոմինդանի ուժերը Չիանգ Կայշիի գլխավորությամբ տեղափոխվեցին Թայվան։ Կղզու և մայրցամաքային Չինաստանի միջև գործարար և ոչ պաշտոնական շփումները վերսկսվեցին 1980-ականների վերջին։
Թայվանի շուրջ իրավիճակը սրվեց, երբ ԱՄՆ ներկայացուցիչների պալատի նախկին խոսնակ Նենսի Փելոսին 2022 թվականի օգոստոսին այցելեց կղզի։ Չինաստանը, որը կղզին համարում է իր նահանգը, դատապարտեց այդ այցը՝ հայտարարելով, որ ԱՄՆ-ն աջակցում է թայվանական անջատողականությանը: