ԵՐԵՎԱՆ, 7 ապրիլի – Sputnik. Արցախում մանրածախ ապրանքների գնաճը ՌԴ խաղաղապահների հետ համատեղ աշխատանքի արդյունքում սկսել է կարգավորվել։ Այս մասին գրառում է արել Արցախի պետնախարար Գուրգեն Ներսիսյանը։
Նա հիշեցրել է, որ Արցախը Հայաստանին կապող միակ ճանապարհի արգելափակումից հետո շուկայում ձևավորվել էր մանրածախ պարենային ապրանքների բավականին մեծ գնաճ, ինչը պայմանավորված էր մի խումբ տնտեսվարող սուբյեկտների կողմից իրականացված անօրինական գործողություններով:
«Այդ անընդունելի երևույթին վերջ տալու համար Արցախի Հանրապետության կառավարությունը և իրավապահ մարմինները բավականին մեծ աշխատանք են կատարել, որին միացել են նաև Արցախում ՌԴ խաղաղապահ ուժերը, այդ թվում` նրանց կազմում ընդգրկված ՌԴ իրավապահ մարմինների ներկայացուցիչները»,– գրել է նա ֆեյսբուքյան էջում։
Ներսիսյանը հավելել է, որ այս առումով համագործակցությունը արդեն բավականին արդյունքներ է ապահովել։ Համատեղ մշակվել են և շարունակաբար մշակվում են հնարավոր կոռուպցիոն գործարքները բացահայտելու և դրանց կատարմանը նպաստող պայմանները վերացնելու քայլերը։
«Ուզում եմ առանձնահատուկ ընդգծել Արցախում ՌԴ խաղաղապահ ուժերի հրամանատարության և ՌԴ անվտանգության դաշնային ծառայության ծառայողների ջանքերը, որոնք էականորեն նպաստեցին իրավիճակի համեմատական կարգավորմանը»,– նշել է նա։
Պետնախարարի խոսքով` այս ուղղությամբ համատեղ աշխատանքները կրելու են շարունակական բնույթ։
Հիշեցնենք` դեկտեմբերի 12-ի առավոտյան Շուշի-Քարին տակ խաչմերուկի հատվածում քաղաքացիական հագուստով մի խումբ ադրբեջանցիներ բնապահպանական պատճառաբանությամբ փակել են Արցախը Հայաստանին կապող Ստեփանակերտ-Գորիս մայրուղին։
Դեկտեմբերի 13-ից սկսած` ադրբեջանական կողմը ժամանակ առ ժամանակ անջատում է Արցախի գազամատակարարումը։
Հունվարի 9-ից ադրբեջանական վերահսկողության տակ գտնվող տարածքից անջատվել է նաև Հայաստանից դեպի Արցախ էներգասնուցումը: Ադրբեջանական կողմը հնարավորություն չի տալիս, որ մասնագետները մոտենան և հասկանան պատճառները՝ անհրաժեշտության դեպքում վթարավերականգնողական աշխատանքներ իրականացնելու համար: Արցախում էլենտրաէներգիայի մատակարարումն իրականացվում է հովհարային անջատումներով։
Լաչինի միջանցքը շարունակում է փակ մնալ։