ԵՐԵՎԱՆ, 6 ապրիլի – Sputnik. Լոռու մարզում` Վանաձոր–Գյումրի ճանապարհին, մարդատար գազելն ու վերամբարձ կռունկը բախվել են, ինչի հետևանքով կան վիրավորներ։ Տեղեկությունը հայտնում է ՆԳՆ մամուլի ծառայությունը։
Միջադեպը եղել է ապրիլի 6-ին, ժամը 17:20-ի սահմաններում։
«Վանաձորի Շիրակի խճուղում «MAZ» մակնիշի ավտոկռունկը (վարորդ՝ Դ․ Չ․) բախվել է Վանաձոր-Գյումրի երթուղին սպասարկող «GAZel» մակնիշի ավտոմեքենային (վարորդ՝ Խ․ Հ․)։ Մինչ փրկարարների կանչի վայր հասնելը՝ «GAZel» մակնիշի ավտոմեքենայի ուղևոր Լ․ Ա․-ն (ծնված 1990-թ․) տեղափոխվել է Վանաձոր քաղաքի ԲԿ, որտեղ բժիշկները տուժածի առողջական վիճակը գնահատել են բավարար»,–ասված է հաղորդագրության մեջ։
Վթարի փաստով քննչական վարչությունում նախաձեռնվել է վարույթ։ Ոստիկանությունն ու քննչական վարչությունը պարզում են վարորդների ինքնությունը։Փրկարարներն իրականացրել են ավտոճանապարհի լվացման աշխատանքներ։
Shamshyan.com-ի տեղեկություններով` գազելը սպասարկում է Վանաձոր-Գյումրի թիվ 430 երթուղին։