ԵՐԵՎԱՆ, 6 ապրիլի – Sputnik. Հայաստանի առևտրային բանկերը որևէ պատժամիջոցի չեն ենթարկվել։ Տեղեկությունը Sputnik Արմենիային հայտնեցին ՀՀ կենտրոնական բանկից` պատասխանելով մեր գրավոր հարցմանը։
Sputnik Արմենիան վերջին շրջանում ընթերցողներից բազմաթիվ բողոքներ է ստանում` կապված ՀՀ–ից արտասահման փոխանցումների հետ։ Ուստի ԿԲ–ից հետաքրքրվել էինք, թե ինչով է պայմանավորված խնդիրը, և արդյոք դա կապ ունի SWIFT համակարգի և ՌԴ–ի նկատմամբ կիրառված սահմանափակումների հետ։
«Արևմտյան, հատկապես ԱՄՆ առևտրային բանկերն այժմ վերանայում են իրենց գործարքների վերահսկողական համակարգը ՌԴ–ի նկատմամբ պատժամիջոցների հետ կապված, որի շրջանակներում զգալիորեն խստացվել են պայմանները նաև տարածաշրջանի բոլոր բանկերի, այդ թվում`հայկական բանկերի արտասահմանյան գործարքների համար»,– ասված է ԿԲ–ի հաղորդագրությունում։
Նշվում է նաև, որ այդ հանգամանքից դրդված` տեղական բանկերը ստիպված են խստացնել իրենց հաճախորդների նկատմամբ պահանջները, այդ թվում` մերժել փոխանցումները, եթե դրանք ռիսկային համարվեն։
«Այդ գործընթացի ներքո կարող է ավելանալ նաև մերժումների քանակը, եթե առևտրային բանկերը իրենց գնահատման չափանիշների ներքո գործարքները գնահատեն որպես ռիսկային»,– հայտնում են ԿԲ–ից։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։ Ռազմական գործողությունները շարունակվում են մինչ օրս։
Փետրվարի 21-ից ի վեր, երբ Վլադիմիր Պուտինը հայտարարեց ԼԺՀ-ն ու ԴԺՀ-ն ճանաչելու որոշման մասին, ԱՄՆ-ն, Եվրամիությունն ու Արևմուտքի շատ երկրներ պատժամիջոցների շարք սահմանեցին Ռուսաստանի դեմ։ Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։