ԵՐԵՎԱՆ, 6 ապրիլի – Sputnik. 2023թ–ի առաջին եռամսյակում 2022-ի նույն ժամանակահատվածի համեմատ 15.2 տոկոսով ավելի հարկ է հավաքագրվել։ Այս մասին այսօր ՀՀ կառավարության նիստում հայտարարեց վարչապետ Նիկոլ Փաշինյանը։
«2023թ–ի բյուջեի եկամտային մասը շատերը համարում էին ռիսկային, շատերը համարում էին ոչ իրատեսական, բայց ուրախությամբ պետք է արձանագրեմ, որ 2023թ–ի առաջին եռամսյակի բյուջեի հարկային եկամուտները գերակատարվել են 14 մլրդ դրամով։ Առաջին եռամսյակի հարկային եկամուտները 2022թ–ի առաջին եռամսյակի նկատմամբ աճել են 15.2 տոկոսով կամ շուրջ 60.8 մլրդ դրամով»,– ասաց նա։
Վարչապետը հայտնեց նաև, որ այդ գումարներից հարկատուներին է վերադարձվել 93.5 մլրդ դրամ, ինչը 2022–ի նույն ցուցանիշից 82 տոկոսով կամ 42.2 մլրդ դրամով ավելի է։
Նշված գումարից 13.4 մլրդ դրամը ֆիզիկական անձանց վերադարձված եկամտահարկի գումարն է, որը 2022-ի նույն ցուցանիշից 4.4 մլրդ–ով ավելի է։ Փաշինյանը հիշեցրեց, որ եկամտահարկի վերադարձը ՀՀ–ում իրականացվում է հիմնականում հիպոտեկային վարկի վճարման նպատակով։
«Սա նշանակում է, որ մարդիկ ավելի ու ավելի մեծ ծավալներով բնակարաններ են ձեռք բերում նորակառույցներում, և մենք էլ նրանց աջակցում ենք»,– ասաց Փաշինյանը։
Վարչապետն անդրադարձավ նաև ՀԴՄ կտրոնների ցուցանիշներին, մասնավորապես ասելով, որ 2023թ–ի առաջին եռամսյակում տպվել է 564 մլրդ դրամի կտրոն, դա 48.7 մլրդ–ով կամ 9.4 տոկոսով գերազանցում է նախորդ տարվա նույն ժամանակահատվածի ցուցանիշը։