ԵՐԵՎԱՆ, 5 ապրիլի - Sputnik. ԱՄՆ-ում ՀՀ դեսպան Լիլիթ Մակունցի հետ հանդիպած մարդիկ շատ վաղուց դաշնակցականներ չեն։«Հրապարակի» հետ զրույցում այս մասին ասել է ՀՅԴ բյուրոյի անդամ Կիրո Մանոյանը` հավելելով, որ այսկերպ իշխանությունները փորձում են հասարակությանն ապակողմնորոշել։
Երեկ «Հրապարակը» գրել էր, որ ԱՄՆ-ում ՀՀ դեսպան Լիլիթ Մակունցն օրեր առաջ դեսպանատանն ընդունել է մի խումբ ինքնակոչ դաշնակցականների՝ ՀՅԴ Արևմտյան Ամերիկայի Կենտրոնական կոմիտեի անդամներ Քարմէն Օհանեանին, Յարութ Մկրտիչեանին և Վահան Պզտիկեանին, նրանց համայնքում «Նիկոլից ավելի Նիկոլ» են անվանում:
Գաղտնիք չէ, որ ԱՄՆ-ում ՀՅԴ բոլոր կառույցները բոյկոտում են Մակունցին։ Եվ այն, որ դեսպանն իր մոտ է հրավիրել ՀՅԴ-ից մի քանի տարի առաջ վտարված ՀՅԴ արևմտյան կառույցի ներկայացուցիչներին, խիստ զայրացրել է ԱՄՆ-ի ՀՅԴ-ականներին:
«Հասարակության մոտ սխալ կարծիք են փորձում ձևավորել, այդ խումբը, որին դաշնակցական են անվանում իշխանությունները, կուսակցության հետ խնդիրներ են ունեցել և արդեն շատ վաղուց դաշնակցականներ չեն: Հանրության մեջ փորձում են շփոթմունք առաջացնել»,- թերթին ասել է Կիրո Մանոյանը:
Նրա խոսքով` դաշնակցականներն այս իշխանությունների հետ չեն կարող հանդիպել այնքան ժամանակ, քանի դեռ նրանք չեն փոխել իրենց գաղափարախոսությունը։