ԲՀԿ–ական նախկին պատգամավորը ապօրինի ծագմամբ գույքի գործով հրավիրվել է դատախազություն

ԵՐԵՎԱՆ, 4 ապրիլի – Sputnik. «Բարգավաճ Հայաստան» կուսակցության նախկին պատգամավոր Աբրահամ Մանուկյանին, նրա երկու որդիներին՝ Արթուր և Հակոբ Մանուկյաններին, կնոջը՝ Աիդա Մանուկյանին ապօրինի ծագմամբ գույքի գործով հրավիրել են ՀՀ գլխավոր դատախազություն։ Տեղեկությունը հրապարակվել է azdarar.am պաշտոնական հայտարարությունների կայքում։

Նրանք բոլորը հրավիրել են դատախազություն Երևան քաղաքի Տիգրան Մեծ պ. 50 հասցեում գտնվող գույքի վերաբերյալ նյութերին ծանոթանալու, դիրքորոշում և հայտարարագիր ներակայացնելու համար։

Նշենք, որ Sputnik Արմենիայի գրավոր հարցման ի պատասխան ՀՀ գլխավոր դատախազությունից հայտնել էին, որ 3 տարի առաջ ձևավորված Ապօրինի ծագում ունեցող գույքի բռնագանձման գործերով վարչությունում մինչ 2023թ-ի մարտ ամիս նախաձեռնել է 374 ուսումնասիրություն, որից ՀՀ հակակոռուպցիոն դատարան է ներկայացվել 29 հայցադիմում։

Հիշեցնենք, որ 2020-ի հունիսի 27-ին Երևան քաղաքի ընդհանուր իրավասության դատարանը բավարարել էր Աբրահամ Մանուկյանի նկատմամբ կալանքը որպես խափանման միջոց ընտրելու միջնորդությունը։

Մանուկյանին մեղադրանք է առաջադրվել ՀՀ քրեական օրենսգրքի 38-154.2 հոդվածի 2-րդ մասով՝ ՀՀ Ազգային ժողովի 2017թ. ապրիլի 2-ի ընտրություններին մասնակցած «Ծառուկյան» կուսակցությունների դաշինքի և դրա կողմից առաջադրված թեկնածուի օգտին քվեարկելու համար ընտրողներին կաշառք տալը կազմակերպելուն Գագիկ Ծառուկյանին և այլոց հանցակցելու համար։ 2020–ի հուլիսի 9–ին Մանուկյանն ազատ է արձակվել։

Մանուկյանը 2003 թվականի մայիսի 25-ին ՀՀ Ազգային ժողովի 3-րդ գումարման պատգամավոր է ընտրվել ՀՀԿ համամասնական ընտրացուցակով։ 2007 թվականի դեկտեմբերի 12-ին նշանակվել է Հայաստանի Հանրապետության առողջապահության նախարարի տեղակալ։ Այդ պաշտոնից ազատվել է 2010 թվականի նոյեմբերին։ 2012 թվականի մայիսի 6-ին ՀՀ Ազգային ժողովի 5-րդ գումարման պատգամավոր է ընտրվել «Բարգավաճ Հայաստան» կուսակցության համամասնական ընտրացուցակով։ 2018 թ․-ից հեռացել է քաղաքականությունից։