ԵՐԵՎԱՆ, 5 ապրիլի – Sputnik. ԱՄՆ նախագահ Ջո Բայդենի, Եվրախորհրդի ղեկավար Շառլ Միշելի և Եվրահանձնաժողովի ղեկավար Ուրսուլա ֆոն դեր Լյայենի հանդիպումը նախատեսվում է անցկացնել հոկտեմբերին։ Տեղեկությունը հայտնում է «Politico»–ն` հղում անելով ԵՄ պաշտոնյաներին։
Հոկտեմբերին նախանշված հավանական օրը համընկնում է ԵՄ–ի և ԱՄՆ–ի միջև պողպատե և ալյումինե արտադրանքի տուրքերի վերաբերյալ որոշում կայացնելու վերջնաժամկետի հետ։
Ըստ պարբերականի` հոկտեմբերին ԵՄ–ԱՄՆ գագաթնաժողովի անցկացումը կարող է ազդել Չինաստանի հետ ԵՄ–ի հաջորդ գագաթնաժողովի ամսաթվի վրա, որն ավելի վաղ նախատեսվում էր անցկացնել հունվարին, սակայն ԵՀ–ում պնդում են, որ այն չի կարող անցկացվել ԵՄ–ի ղեկավարության հետ Բայդենի հանդիպումից շուտ։