ԵՐԵՎԱՆ, 4 ապրիլի – Sputnik. Շվեդիան, ինչպես և Ֆինլանդիան, կատարել է ՆԱՏՕ-ին անդամակցելու բոլոր պայմանները։ Ֆինլանդիայի անդամակցության արարողությունից հետո կայացած ասուլիսի ժամանակ այս հայտարարությունն է արել դաշինքի գլխավոր քարտուղար Յենս Ստոլտենբերգը։
«Ոչ միայն Ֆինլանդիան, այլև Շվեդիան էլ է կատարել իր պարտավորությունները եռակողմ համաձայնագրին համապատասխան։ Հետևաբար չպետք է խոչընդոտներ լինեն Շվեդիայի հայտի վերջնական վավերացման և ՆԱՏՕ-ի անդամակցության համար: Դա առաջնահերթություն է ՆԱՏՕ-ի համար»,-ասել է նա։
Հիշեցնենք` Ֆինլանդիան և Շվեդիան անցած տարվա մայիսին ՆԱՏՕ-ի գլխավոր քարտուղարին փոխանցեցին դաշինքին անդամակցելու հայտերը:
Ապրիլի 4-ին Ֆինլանդիան պաշտոնապես դարձավ ՆԱՏՕ-ի անդամ: Երկրի արտգործնախարար Պեկկա Հաավիստոն Հյուսիսատլանտյան պայմանագրին միանալու մասին փաստաթուղթը փոխանցեց ԱՄՆ պետքարտուղար Էնթոնի Բլինկենին, ինչը նշանակում է, որ Ֆինլանդիայի անդամակցության պաշտոնական ընթացակարգն ավարտվեց։
2022 թվականի մայիսին Ֆինլանդիայի հետ հայտ ներկայացրած Շվեդիայի անդամակցությունը հետաձգվում է Թուրքիայի առարկությունների պատճառով։ Եթե Շվեդիան միանա դաշինքին, ընդհանուր սահմանների երկարությունը կավելանա ևս 233 կիլոմետրով։