ԵՐԵՎԱՆ, 4 ապրիլի – Sputnik. Ալեն Սիմոնյանի ու Նիկոլ Փաշինյանի միջև որևէ տարաձայնություն բացառված է, ավելին` երբևիցե չի կարող լինել։ Այս մասին այսօր լրագրողների հետ զրույցում հայտարարեց ՀՀ ԱԺ խոսնակ Ալեն Սիմոնյանը
«Մենք մի թիմ ենք, ինքն իմ ղեկավարն է, իմ ընկերն ու գործընկերն է»,- հայտարարեց նա։
Հնարավոր տարաձայնությունների մասին հարցը ծագել էր, քանի որ այսօր ՀՀ վարչապետ Նիկոլ Փաշինյանի որդին հայտարարել էր, որ իր վրա ոչ ոք չի հարձակվել, այնինչ Ալեն Սիմոնյանը երեկ իր ֆեյսբուքյան էջում գրել էր, որ Աշոտ Փաշինյանը հարձակման է ենթարկվել։ Ավելի ուշ նա հեռացրել էր գրառումը։
Լրագրողի դիտարկմանը, որ ստացվում է, որ դուք ստել եք, Ալեն Սիմոնյանն արձագանքեց. «Չէ, այդպիսի բան չի նշանակում: Ես որևիցե որակում չեմ տալու, իմ քաղաքական գնահատականը նույնն է մնում»:
Ճշտող հարցին, թե այդ դեպքում ինչու ջնջեցիք գրառումը, նա ասաց. «Որովհետև ես չեմ ուզում իմ մոտ լինի բան, որն իրականության հետ խնդիր ունի: Չճշտված բան չի, գնահատականն է, որ կարծում եմ՝ տարբեր է: Ես չեմ ուզում հիմա որևէ ձևով հակադրվեմ կամ մեկնաբանեմ: Ուրախ եմ, որ ամեն ինչ լավ է, բայց քաղաքական սադրանքները կան, քաղաքական սադրանքների շարքը կա եւ դրանք կարծում եմ՝ փորձելու են շարունակել»։
Հիշեցնենք, որ ավելի վաղ Հայաստանի ՆԳՆ մամուլի ծառայությունը հայտարարել էր, որ վարչապետի որդու վրա հարձակման մասին հաղորդում չեն ստացել։