ԵՐԵՎԱՆ, 1 ապրիլի – Sputnik. ԱՄՆ նախկին նախագահ Դոնալդ Թրամփին առնվազն մեկ քրեական մեղադրանք կներկայացվի։ Տեղեկությունը հայտնում է «The Associated Press» գործակալությունը` հղում անելով իրազեկ աղբյուրներին։
Ավելի վաղ հայտնի էր դարձել, որ Թրամփին մեղադրանքներ առաջադրելուն կողմ է քվեարկել Նյու Յորքի երդվյալ ատենակալների մեծ ժյուրին։ Պաշտոնապես մեղադրանքները կհրապարակվեն միայն այն ժամանակ, երբ Թրամփը ներկայանա դատարան, սակայն ենթադրվում է, որ խոսքը պոռնոդերասանուհի Սթորմի Դենիելսի գործի մասին է. նրան իբր մեծ գումար են վճարել նախկին նախագահի հետ ենթադրյալ սիրավեպի մասին լռելու համար։
Գործակալության տվյալներով` Թրամփի դեմ ուղղված բազմաթիվ մեղադրանքները կապված են պաշտոնական փաստաթղթերը կեղծելու հետ։
Սպասվում է, որ Թրամփը դատարան կներկայանա ապրիլի 4-ին։ Քաղաքական գործչի փաստաբան Ջո Տակոպինան ավելի վաղ ասել է, որ ԱՄՆ նախկին նախագահը դատարան ներկայանալիս մտադիր է հայտարարել իր անմեղության մասին։
Թրամփն արդեն հերքել է Դենիելսի հետ կապը և վստահեցրել, որ ինքը որևէ հակաիրավական գործողություն չի արել։ Նա նաև հայտարարել է, որ հետապնդումը պայմանավորված է քաղաքական դրդապատճառներով և կապված է 2024 թվականի նախագահի պաշտոնի համար պայքարելու իր մտադրության հետ։