ԵՐԵՎԱՆ, 31 մարտի – Sputnik. Ռուսական «Solvex» տուրօպերատորի գործունեության դադարեցումը բացասական ազդեցություն չի ունենա Ռուսաստանից Հայաստան զբոսաշրջային հոսքի վրա։ Sputnik Արմենիայի հետ զրույցում այս տեսակետը հայտնեց Տուրիզմի հայկական ֆեդերացիայի նախագահ Մեխակ Ապրեսյանը։
«Ռուսաստանից Հայաստան զբոսաշրջային այցերի զգալի մասը, ես կասեի` մեծ մասը անհատական այցելություններն են։ Փոքր մասն է կազմակերպվում հայ գործընկերների հետ ռուսական ընկերությունների համագործակցությամբ։ Բացի այդ, տուրերի կազմակերպմամբ զբաղվում է ոչ միայն այդ («Solvex». խմբ.), այլև մի շարք այլ ընկերություններ։ Դա նշանակում է, որ տուրօպերատորի գործունեության կասեցումը բացասական մեծ ազդեցություն չի ունենա զբոսաշրջային այցերի վրա», – ասաց Ապրեսյանը։
Միևնույն ժամանակ, Ապրեսյանի խոսքով, զբոսաշրջային ոլորտում ցանկացած ընկերության գործունեության դադարեցում ափսոսանք է առաջացնում։
Նա հայտնեց նաև, որ 2022 թվականին Հայաստանում շուրջ 1,665 մլն զբոսաշրջային այցելություն է արձանագրվել, կեսից ավելին` ՌԴ–ից։
«Ճնշող մեծամասնությունը անհատական այցելություններն են։ Կազմակերպված զբոսաշրջությունը դեռ կայուն վերականգնման փուլ չի մտել։ Դա պայմանավորված է հետկորոնավիրուսային, հետպատերազմական ու այսօրվա անկայուն իրավիճակով»,– նշեց Ապրեսյանը։
Մարտի 30-ին «Solvex» զբոսաշրջային օպերատորը հայտարարել է, որ դադարեցնում է գործունեությունը, քանի որ չի կարողանում կատարել զբոսաշրջային ծառայությունների իրացման պայմանագրերով ստանձնած պարտավորությունները։ «Solvex»–ը հիմնադրվել է 1993 թվականին, ռուսական շուկայի ամենահին զբոսաշրջային օպերատորներից մեկն է։