Ռուսական ռազմակայանի մոտոհրաձիգները վարժանքներ են անցկացրել հայաստանյան զորավարժարանում

ԵՐԵՎԱՆ, 31 մարտի — Sputnik. Հարավային ռազմական օկրուգի (ՀՌՕ) մոտոհրաձգային ստորաբաժանումների զինծառայողները ստուգիչ հրաձգության վարժանքներ են կատարել «Ալագյազ» բարձրլեռնային զորավարժարանում: Տեղեկությունը հայտնում է Հարավային ռազմական օկրուգի մամուլի ծառայությունը։

Նշվում է, որ մոտոհրաձիգները Կալաշնիկով ԱԿ-74 ինքնաձիգներից կրակել են շարժվող և հայտնվող թիրախների ուղղությամբ, ինչպես նաև ուսումնական-իմիտացիոն ձեռքի նռնակի նետման վարժություններ են կատարել։

Թիրախին ճշգրիտ հարվածելու համար զինծառայողներն ուսումնասիրել են հրաձգության վարման օդերևութաբանական, տեղագրական ու բալիստիկ առանձնահատկությունները:

Ստուգիչ հրաձգության վարժանքներից առաջ ՀՌՕ զինծառայողները փուլ առ փուլ մշակել են հրաձգության ժամանակ համալիր գործողությունների յուրաքանչյուր տարրը՝ մարտի պատրաստություն, կրակային դիրքի փոփոխություն, ինքնաձիգի ոչ ամբողջական քանդում–հավաքում և պահեստատուփի լիցքավորում: