ԵՐԵՎԱՆ, 31 մարտի – Sputnik. Բելառուսի նախագահ Ալեքսանդր Լուկաշենկոն ժողովրդին ուղղված ամենամյա ուղերձում հայտարարել է, որ անհրաժեշտության դեպքում կարող է պայմանավորվել ՌԴ առաջնորդ Վլադիմիր Պուտինի հետ երկիր ռազմավարական միջուկային զենք մտցնելու վերաբերյալ։ Նրա խոսքը մեջբերում է ՌԻԱ Նովոստին։
«Մեկ շաբաթ առաջ մեր զինվորականներին կարգադրել եմ անհապաղ վերականգնել այն հարթակները, որոնց վրա տեղադրված էին «Տոպոլ» համալիրներն իրենց միջուկային մարտագլխիկներով («Տոպոլը» ռազմավարական հրթիռային համակարգ է. խմբ.)։ Ես այդ բոլոր հարթակները պահպանել եմ», – ասել է Լուկաշենկոն` դիմելով ժողովրդին և խորհրդարանին։
Միաժամանակ Լուկաշենկոն հայտարարել է, որ անհրաժեշտության դեպքում ինքը կարող է պայմանավորվել Պուտինի հետ Բելառուսում ռազմավարական միջուկային զենք տեղադրելու վերաբերյալ։ «Եթե անհրաժեշտություն լինի, Պուտինի հետ կորոշենք և այստեղ նաև ռազմավարական զենք կմտցնենք», – ասել է նա` ընդգծելով, որ Արևմուտքը պետք է հասկանա դա։
Բելառուսի նախագահը վստահեցրել է, որ ինչպես ինքը, այնպես էլ ՌԴ նախագահը որևէ բանի առաջ կանգ չեն առնի իրենց երկրներն ու ժողովուրդներին պաշտպանելու համար։