ԵՐԵՎԱՆ, 30 մարտի – Sputnik. Գեղարքունիքի Ազատ գյուղի զինվորական կացարանում հրդեհի հետևանքով մահացած 15 զինծառայողների ծնողները լիարժեք բավարարված չեն ՀՀ զինվորական դատախազ Գրիգոր Էլիզբարյանի հետ հանդիպումից: Այս մասին նրանք հայտարարեցին մոտ 3 ժամ տևած փակ հանդիպումից հետո։
«Մեր հարցերը տվել ենք, դրանց շրջանակներում քննություն է ընթանում, նախաքննական գաղտնիք ես չեմ կարող բացահայտել: Հույս ունենանք՝ մեր հարցերի պատասխանները բոլորս կստանանք»,- ասաց մահացած զինծառայող Գագիկ Բարսեղյանի հայրը՝ Արման Բարսեղյանը:
Զինդատախազի հետ հանդիպման ժամանակ ծնողներն ու նրանց ներկայացուցիչ Նորայր Նորիկյանը տեղեկացել են, որ հրդեհի գործով կան տարբեր վարկածներ ու դրանք բոլորը ուսումնասիրվում են։
«Ասել են, որ այլ վարկածների գոյությունը այս պահին բացառված չէ, ընթանում են ստուգողական, քննչական, դատավարական գործողություններ` հնարավոր բոլոր վարկածների ուղղությամբ, բայց կոնկրետ որևէ արդյունք, որևէ վարկածի վերաբերյալ մեզ սպառիչ տեղեկատվություն չի տրամադրվել»,– լրագրողների հետ զրույցում ասաց փաստաբան Նորայր Նորիկյանը։
Նա նշեց, որ այս գործով այս պահին 5 անձ քրեական հետապնդման է ենթարկվում։ Զինվորական դատախազն այսօր չի բացառել, որ նրանց թիվը կավելանա։
Հիշեցնենք` հունվարի 19-ին՝ ժամը 01:30-ի սահմաններում, հրդեհ էր բռնկվել Գեղարքունիքի մարզի Ազատ գյուղի տարածքում տեղակայված ՀՀ ՊՆ N զորամասի ինժեներասակրավորային վաշտի կացարանում: Հրդեհի հետևանքով զոհվել էին 15, վնասվածքներ ստացել` 7 զինծառայող։
Դեպքից անմիջապես հետո պաշտոններից ազատվել էին 2-րդ բանակային կորպուսի հրամանատարն ու այլ բարձրաստիճան զինվորականներ։
Քրեական վարույթ է նախաձեռնվել ՀՀ քրեական օրենսգրքի 532-րդ հոդվածի 4-րդ մասի հատկանիշներով (զենքի, ռազմամթերքի, ռազմական տեխնիկայի կամ ռազմական այլ գույքի, շրջապատի համար առավել վտանգ ներկայացնող նյութերի, սարքերի կամ առարկաների հետ վարվելու կանոնները խախտելը, որն անզգուշությամբ առաջացրել է երկու կամ ավելի անձանց մահ)։ Քրեական վարույթ է նախաձեռնվել նաև պաշտոնատար անձանց կողմից հրդեհային անվտանգության սահմանված կանոնները չպահպանելու, դրա հետ կապված գործառույթները կատարելու հարցում առերևույթ անփութություն դրսևորելու փաստի առթիվ։
Այս գործով կալանավորվել է ՀՀ ՊՆ N զորամասի թիկունքի պետ-հրամանատարի թիկունքի և կոմունալ շահագործման ծառայության գծով տեղակալ Գոռ Աղեկյանը։
Եղիշե Հակոբյանից բացի քրգործ է հարուցվել նաև զորամասի ինժեներասակրավորային վաշտի հրամանատար Գ.Մ.-ի նկատմամբ։