ԵՐԵՎԱՆ, 30 մարտի – Sputnik. Ազգային ժողովի «Հայաստան» և «Պատիվ ունեմ» խմբակցությունների` ՀՀ մարդու իրավունքների պաշտպանի թեկնածու առաջադրված Էդգար Ղազարյանը հանդիպման առաջարկով դիմել է իշխող «Քաղաքացիական պայմանագիր» խմբակցությանը։ Նա այդ մասին հայտնել է ֆեյսբուքյան էջում։
«Պաշտոնապես դիմել եմ Ազգային ժողովի «Քաղաքացիական պայմանագիր» խմբակցության ղեկավարին (նաև քարտուղարին, որը հանդիսանում է նաև ՀՀ ԱԺ մարդու իրավունքների և հանրային հարցերի մշտական հանձնաժողովի անդամ)` կազմակերպելու համար իմ հանդիպումը խմբակցության պատգամավորների հետ»,– գրել է նա։
Ընդդիմության ՄԻՊ թեկնածուն առաջարկել է հանդիպման բաց և հրապարակային ձևաչափը` զանգվածային լրատվամիջոցների ներկայացուցիչների մասնակցությամբ, ուղիղ եթերով հեռարձակման հնարավորությամբ։
Նա միաժամանակ ընդունելի է համարել իշխող խմբակցության կողմից առաջարկվող այլ ձևաչափով հանդիպման հնարավորությունը։
Հիշեցնենք` հունվարի 23-ին Քրիստինե Գրիգորյանը հրաժարվեց ՄԻՊ պաշտոնից։
Մարտի 28-ին հայտնի դարձավ, որ «Պատիվ ունեմ» և «Հայաստան» խմբակցությունները ՀՀ մարդու իրավունքների պաշտպանի թեկնածու են առաջադրել Վայոց Ձորի նախկին մարզպետ, Լեհաստանում ՀՀ նախկին դեսպան, ՀՀ սահմանադրական դատարանի աշխատակազմի նախկին ղեկավար Էդգար Ղազարյանին։
Նուն օրը «Քաղաքացիական պայմանագիր» խմբակցությունը պաշտոնապես առաջադրեց իր թեկնածուին` Անահիտ Մանասյանին, որն այժմ գլխավոր դատախազի տեղակալն է։